ભારત-જાપાનની મજબૂત ભાગીદારી: PM મોદીની જાપાન યાત્રામાં AI અને સ્ટાર્ટઅપ્સ પર મોટી જાહેરાતની આશા

PM Modi Japan visit: વડાપ્રધાન નરેન્દ્ર મોદી 29 ઓગસ્ટથી જાપાનની ત્રણ દિવસીય યાત્રા પર જશે, જેમાં બંને દેશો વચ્ચે આર્થિક અને વ્યૂહાત્મક સંબંધોને વધુ મજબૂત કરવાનો પ્રયાસ થશે. આ યાત્રા દરમિયાન જાપાન ભારત માટે 10 ટ્રિલિયન યેન (68 બિલિયન અમેરિકી ડૉલર)ના રોકાણનું લક્ષ્ય જાહેર કરી શકે છે, જે 2022માં જાહેર થયેલા 5 ટ્રિલિયન યેનના લક્ષ્યાંકથી બમણું છે.

જાપાનના વડાપ્રધાન શિગેરુ ઇશિબા અને PM મોદી વચ્ચે શિખર બેઠક બાદ એક સંયુક્ત નિવેદનમાં આ નવા રોકાણ લક્ષ્યની જાહેરાત થવાની શક્યતા છે. આ ઉપરાંત, બંને દેશો આર્થિક સુરક્ષા માટે નવું ફ્રેમવર્ક ઊભું કરવા પર પણ કામ કરી રહ્યા છે, જેમાં સેમીકંડક્ટર, આવશ્યક ખનીજ, કોમ્યુનિકેશન, ગ્રીન એનર્જી, AI અને દવાઓ જેવા મહત્વના ક્ષેત્રોનો સમાવેશ થશે.

આ યાત્રા દરમિયાન ભારત અને જાપાન નવી ટેક્નોલોજી અને સ્ટાર્ટઅપ્સ પર કેન્દ્રિત એક AI સહયોગ યોજનાની પણ જાહેરાત કરી શકે છે. એક સૂત્રએ જણાવ્યું કે, “જે ક્ષેત્રોમાં ભારતીય કંપનીઓ મજબૂત છે, તેમાં જાપાની કંપનીઓ સાથે સહયોગથી જાપાનની અર્થવ્યવસ્થાને વિકાસમાં મદદ મળશે.”

PM મોદી મિયાગી પ્રાંતના સેન્ડાઈમાં પ્રાયોગિક શિંકાન્સેન બુલેટ ટ્રેનની મુલાકાત લઈ શકે છે અને ચિપ બનાવવાના સાધનોની અગ્રણી જાપાની કંપનીનો પણ પ્રવાસ કરી શકે છે. આ યાત્રા ચીનની વધતી આક્રમકતાના સંદર્ભમાં “સ્વતંત્ર અને ખુલ્લા હિન્દ-પ્રશાંત” વિસ્તારને પ્રોત્સાહન આપવા માટે બંને દેશોના સંબંધોને વધુ ગાઢ બનાવશે.

આ પણ વાંચો - Earthquake: દક્ષિણ અમેરિકા નજીક ડ્રેક પેસેજમાં 7.5ની તીવ્રતાનો ભૂકંપ, સુનામીની ચેતવણી જાહેર