Donald Trump tariffs inflation: ટ્રમ્પના ટેરિફથી અમેરિકામાં મોંઘવારીનો માર, રોજિંદી ચીજવસ્તુઓના ભાવ આસમાને

Donald Trump tariffs inflation: અમેરિકાના રાષ્ટ્રપતિ ડોનાલ્ડ ટ્રમ્પે ચૂંટણીમાં મોંઘવારી ઘટાડવાના વાયદા સાથે બીજી ટર્મ મેળવી, પરંતુ તેમની ટેરિફ નીતિઓથી અમેરિકી ગ્રાહકો પર નાણાકીય બોજ વધી રહ્યો છે. વિવિધ દેશો પર લગાવેલા ભારે ટેરિફના કારણે આયાતી ચીજવસ્તુઓની કિંમતોમાં વધારો થયો છે, જેની સીધી અસર ગ્રાહકોના ખિસ્સા પર પડી રહી છે.

1933 પછીનો સૌથી વધુ ટેરિફનો બોજ

વોશિંગ્ટનના સેનેટર પેટી મરેના જણાવ્યા મુજબ, ટ્રમ્પની નીતિઓથી અમેરિકીઓ 1933 પછીના સૌથી ઊંચા ટેરિફ ચૂકવી રહ્યા છે. યેલ બજેટ લેબના અંદાજ મુજબ, આ ટેરિફથી સરેરાશ અમેરિકી પરિવારને વાર્ષિક 2400 ડોલરનું નુકસાન થશે. આનાથી રોજિંદી ચીજવસ્તુઓ જેવી કે કપડાં, ખોરાક અને કારની કિંમતોમાં વધારો થયો છે.

ખાદ્યપદાર્થોની કિંમતોમાં 3.4%નો વધારો

USDAની ઇકોનોમિક રિસર્ચ સર્વિસના તાજેતરના રિપોર્ટ મુજબ, જૂનથી જુલાઈ 2025 દરમિયાન ખાદ્ય ઉપભોક્તા મૂલ્ય સૂચકાંક (CPI)માં 0.2%નો વધારો થયો છે. આ વર્ષના અંત સુધીમાં ખાદ્યપદાર્થોની કિંમતોમાં 3.4%નો વધારો થવાની ધારણા છે, જે 20 વર્ષની સરેરાશ 2.9%થી વધુ છે. ખાસ કરીને ઓછી આવક ધરાવતા પરિવારોને આની ગંભીર અસર થશે.

કૃષિ ઉત્પાદનો પર ટેરિફની અસર

ટ્રમ્પે કેનેડા, મેક્સિકો અને ભારત જેવા દેશો પર ઊંચા ટેરિફ લગાવ્યા છે, જે અમેરિકાને મોટા પ્રમાણમાં કૃષિ ઉત્પાદનોની આયાત કરે છે. 2023માં અમેરિકાએ 195.9 અરબ ડોલરના કૃષિ ઉત્પાદનો આયાત કર્યા, જેમાંથી 44% કેનેડા અને મેક્સિકોમાંથી આવ્યા. આ ટેરિફથી ફળો, શાકભાજી અને માંસ જેવી ચીજોની કિંમતોમાં વધારો થશે.