હવે સપનું થશે સાકાર? અઠવાડિયામાં 4 દિવસ કામ, 3 દિવસ રજા, જાણો સરકારનો સંપૂર્ણ પ્લાન

4-day work week India: ભારતના કરોડો નોકરિયાત લોકો માટે એક મોટા અને સારા સમાચાર સામે આવી રહ્યા છે. જે 4-દિવસ કામ અને 3-દિવસની રજાના સપના જોવામાં આવી રહ્યા હતા, તે હવે હકીકત બની શકે છે. ભારત સરકારે નવા લેબર કોડ હેઠળ આ સિસ્ટમને લાગુ કરવાની સંભાવના પર મહોર લગાવી દીધી છે. ચાલો, આ સમગ્ર મામલાને સરળ શબ્દોમાં સમજીએ.

શું છે સરકારનો પ્લાન?

તાજેતરમાં, શ્રમ અને રોજગાર મંત્રાલયે સ્પષ્ટતા કરી છે કે નવા લેબર કોડ હેઠળ અઠવાડિયામાં મહત્તમ 48 કલાક કામ કરવાની મર્યાદા નક્કી કરવામાં આવી છે. આ નિયમ કંપનીઓને લવચીકતા આપે છે કે તેઓ તેમના કર્મચારીઓ માટે વર્કિંગ-ડેઝ નક્કી કરી શકે છે. જો કોઈ કંપની અઠવાડિયામાં 4 દિવસ કામ અને 3 દિવસ રજાની સિસ્ટમ અપનાવવા માંગે, તો તે કરી શકે છે. પરંતુ તેની સાથે એક શરત જોડાયેલી છે.

12 કલાકની શિફ્ટનો નિયમ

સરકારના જણાવ્યા અનુસાર, જો કોઈ કર્મચારીને અઠવાડિયામાં 3 દિવસની રજા આપવામાં આવે, તો તેણે બાકીના 4 દિવસમાં રોજના 12 કલાક કામ કરવું પડશે. આ રીતે, 4 દિવસમાં કુલ 48 કલાક (12 કલાક/દિવસ x 4 દિવસ) કામ પૂર્ણ થઈ જશે. આ 12 કલાકની શિફ્ટમાં કર્મચારીના બ્રેકનો સમય પણ સામેલ હશે. આનો સીધો અર્થ એ છે કે, જો તમારી કંપની ઇચ્છે તો તમને 4 દિવસ બોલાવી શકે છે, પણ પછી તમારે દિવસના 12 કલાક કામ માટે તૈયાર રહેવું પડશે.

ઓવરટાઈમનું શું?

શ્રમ મંત્રાલયે એ પણ સ્પષ્ટ કર્યું છે કે જો કોઈ કંપની કર્મચારી પાસે અઠવાડિયામાં 48 કલાકથી વધુ કામ કરાવે છે, તો તેને ઓવરટાઈમ માટે બમણું વેતન (ડબલ પેમેન્ટ) ચૂકવવું પડશે. આ નિયમ કર્મચારીઓના હિતોનું રક્ષણ કરવા માટે બનાવવામાં આવ્યો છે.