શેરબજારમાંથી કમાણીનો ચસ્કો, 5 મહિનામાં એક કરોડ લોકોએ કરાવ્યું રજિસ્ટ્રેશન

શેરબજારમાં રોકાણકારોનો રસ વધી રહ્યો છે. નેશનલ સ્ટોક એક્સચેન્જ (NSE)ના તાજેતરના આંકડા તેના સાક્ષી છે. NSEએ જણાવ્યું હતું કે તેના રજિસ્ટર્ડ રોકાણકારોની સંખ્યા માત્ર પાંચ મહિનામાં એક કરોડના વધારા સાથે 10 કરોડને પાર કરી ગઈ છે.

NSEએ શું કહ્યું?

સ્ટોક એક્સચેન્જે એક નિવેદનમાં જણાવ્યું - ભારતના નેશનલ સ્ટોક એક્સચેન્જમાં નોંધાયેલા રોકાણકારોનો આધાર 8 ઓગસ્ટ, 2024ના રોજ 10 કરોડનો આંકડો પાર કરી ગયો. આ સાથે, એક્સચેન્જમાં નોંધાયેલા કુલ ગ્રાહક કોડ (એકાઉન્ટ)ની સંખ્યા 19 કરોડ સુધી પહોંચી ગઈ છે. આમાં આજની તારીખે કરાયેલ તમામ ગ્રાહક નોંધણીઓનો સમાવેશ થાય છે. ખાસ વાત એ છે કે ગ્રાહકો એક કરતા વધુ ટ્રેડિંગ મેમ્બર સાથે રજીસ્ટ્રેશન કરાવી શકે છે.

નોંધણી સતત વધી રહી છે

તમને જણાવી દઈએ કે છેલ્લા કેટલાક વર્ષોમાં NSE પર રોકાણકારોની નોંધણીમાં વધારો થયો છે. એક્સચેન્જે જણાવ્યું હતું કે માર્ચ 2021માં નોંધાયેલા રોકાણકારોની સંખ્યા ચાર કરોડ સુધી પહોંચવામાં 25 વર્ષથી વધુ સમય લાગ્યો હતો. આ પછી, લગભગ છ-સાત મહિનામાં સરેરાશ એક-એક કરોડનો વધારો થયો છે. છેલ્લા એક કરોડ રોકાણકારો માત્ર પાંચ મહિનામાં NSEમાં જોડાયા છે.

કઈ ઉંમરના રોકાણકારો

10 કરોડ નોંધાયેલા રોકાણકારોમાંથી, રોકાણકારોની સરેરાશ ઉંમર 32 વર્ષ છે જ્યારે પાંચ વર્ષ પહેલાં તે 38 વર્ષ હતી. આ યુવાનોમાં બજારોમાં વધી રહેલી રુચિને દર્શાવે છે. આજે લગભગ પાંચમાંથી એક રોકાણકાર મહિલા છે.