શેર બજારમાં હજુ 10%નો ઘટાડો આવશે તો મળશે બમ્પર કમાણીની તક! જાણો રામદેવ અગ્રવાલની મોટી ભવિષ્યવાણી

Ramdev Agarwal on market: હાલમાં શેર બજારમાં ચાલી રહેલા ઘટાડાથી ઘણા રોકાણકારો ચિંતિત છે. પરંતુ, માર્કેટના દિગ્ગજ અને મોતીલાલ ઓસ્વાલ ફાઇનાન્સિયલ સર્વિસિસના ચેરમેન તથા કો-ફાઉન્ડર રામદેવ અગ્રવાલે એક મોટી વાત કહી છે. તેમના મતે આ ઘટાડો ગભરાવવાનો નહીં, પણ લાંબા ગાળે તગડી કમાણી કરવાનો એક મોટો અવસર છે. તાજેતરમાં મનીકંટ્રોલ ગ્લોબલ વેલ્થ સમિટમાં તેમણે સ્ટોક માર્કેટને લઈને ઘણી અગત્યની વાતો શેર કરી હતી.

માર્કેટ 10% પડશે તો રિટર્ન વધશે

રામદેવ અગ્રવાલે જણાવ્યું હતું કે, જો અત્યારના લેવલથી શેર બજાર હજુ 10% જેટલું નીચે જાય છે, તો લાંબા ગાળે રોકાણકારો માટે મજબૂત રિટર્નની શક્યતા ઘણી વધી જશે. તેમણે સ્પષ્ટ કર્યું કે, "માર્કેટ 10% પડવા પર આગામી 5 વર્ષ માટે રિટર્ન મળવાની શક્યતા વધીને વાર્ષિક 17 થી 18% જેટલી થઈ જશે."

કોવિડના સમયનું ઉદાહરણ અને કમ્પાઉન્ડિંગનો જાદુ

ઇતિહાસ સાક્ષી છે કે જ્યારે પણ બજારમાં મોટો કડાકો બોલાય છે, ત્યારે લાંબા ગાળે 'કમ્પાઉન્ડિંગ' (ચક્રવૃદ્ધિ) નો શાનદાર મોકો બને છે. તેમણે કોરોના કાળનું ઉદાહરણ આપતા સમજાવ્યું કે, કોવિડ વખતે માર્કેટ ક્રેશ થયા પછી જે રોકાણકારોએ ધીરજ રાખી અને માર્કેટમાં ટકી રહ્યા, તેમને બહુ મોટો ફાયદો થયો હતો. કોવિડના ક્રેશ પછીના વર્ષોમાં માર્કેટે રોકાણકારોને 21 થી 22% જેટલું શાનદાર કમ્પાઉન્ડિંગ રિટર્ન આપ્યું હતું.

સાચા શેરોની પસંદગી કરાવશે 30-35% સુધીની કમાણી

અગ્રવાલની સલાહ છે કે આ સમય કાળજીપૂર્વક સારા શેરો પસંદ કરીને મજબૂત પોર્ટફોલિયો બનાવવાનો છે. જો રોકાણકારો આવા પડતા બજારમાં સાચી કંપનીઓ પકડી લે, તો તેઓ 30 થી 35% સુધીનું જંગી રિટર્ન પણ કમાઈ શકે છે.