સિગરેટ પર GST 40% થયો તો પણ ITC અને ગૉડફ્રે ફિલિપ્સના શેર 4% સુધી વધ્યા, જાણો તેજીનું કારણ

Cigarettes Stocks: GST કાઉન્સિલે સિગારેટ, પાન મસાલા, ગુટખા અને અન્ય તમાકુ ઉત્પાદનો પર GST દર 28 ટકાથી વધારીને 40 ટકા કરવાનો નિર્ણય લીધો છે. આ નિર્ણય 56મી GST કાઉન્સિલની બેઠક દરમિયાન લેવામાં આવ્યો હતો. નાણામંત્રીએ જણાવ્યું હતું કે 40 ટકાનો આ ખાસ દર ફક્ત પાન મસાલા, સિગારેટ, ગુટખા અને જરદા, અનપ્રોસેસ્ડ તમાકુ અને બીડી જેવા તમાકુ ઉત્પાદનો પર લાગુ થશે. જો કે, આ નિર્ણય છતાં, આજે 4 સપ્ટેમ્બરના રોજ શેરબજારમાં સિગારેટ કંપનીઓના શેરમાં વધારો જોવા મળ્યો. સવારે 10 વાગ્યાની આસપાસ, ITC, VST ઇન્ડસ્ટ્રીઝ અને ગોડફ્રે ફિલિપ્સ ઇન્ડિયાના શેર 1 થી 4 ટકાના વધારા સાથે ટ્રેડ થઈ રહ્યા હતા.

બજારના નિષ્ણાતોનું કહેવુ છે કે આ નિર્ણય તમાકુ કંપનીઓ માટે તટસ્થ કે સકારાત્મક સાબિત થઈ શકે છે. તેમણે કહ્યું કે અત્યાર સુધી તમાકુ ઉત્પાદનો પર 28 ટકા GST સાથે સેસ વસૂલવામાં આવતો હતો. આને કારણે, આ કંપનીઓ માટે કુલ અસરકારક કર દર MRP ના લગભગ 50-55 ટકા સુધી પહોંચી ગયો હતો. પરંતુ હવે નવી સિસ્ટમમાં, 40 ટકા GST સિવાય કોઈ સેસ વસૂલવામાં આવશે નહીં.

વૈશ્વિક બ્રોકરેજ ફર્મ જેફરીઝે જણાવ્યું હતું કે જો સરકાર આ નવા GST માળખા સિવાય કોઈ વધારાનો કર લાદશે નહીં, તો તે તમાકુ ઉદ્યોગ માટે ફાયદાકારક રહેશે. જોકે, હજુ સુધી તે સ્પષ્ટ નથી કે તમાકુ ઉત્પાદનો પર લાદવામાં આવેલી રાષ્ટ્રીય આપત્તિ આકસ્મિક ડ્યુટી (NCCD) ચાલુ રહેશે કે નહીં.

બ્રોકરેજ કંપનીએ જણાવ્યું હતું કે જો NCCD વર્તમાન દરે ચાલુ રહે તો પણ કુલ કરનો બોજ લગભગ 5 ટકા ઘટશે. આવી સ્થિતિમાં, તમાકુ કંપનીઓ તેમના ઉત્પાદનોના ભાવ ઘટાડીને ગેરકાયદેસર ખેલાડીઓથી સ્પર્ધામાં આગળ વધી શકે છે.