Lenskart Q3 Results: લેન્સકાર્ટની કમાણીમાં જોરદાર ઉછાળો, નફો 28% વધ્યો; વિદેશમાં ખરીદી નવી કંપની

Lenskart Q3 Results: આઈવેર સેક્ટરની જાણીતી કંપની લેન્સકાર્ટએ તેના ત્રીજા ક્વાર્ટરના (Q3) નાણાકીય પરિણામો જાહેર કર્યા છે. કંપની માટે આ ક્વાર્ટર ખૂબ જ શાનદાર રહ્યું છે. લેન્સકાર્ટના નફામાં અને આવકમાં મોટો ઉછાળો જોવા મળ્યો છે. એટલું જ નહીં, કંપનીએ પોતાના બિઝનેસનો વ્યાપ વધારવા માટે વિદેશમાં એક મોટી કંપની પણ ખરીદી લીધી છે.

નફા અને આવકમાં ધરખમ વધારો

કંપનીના આંકડા પર નજર કરીએ તો, ડિસેમ્બર ક્વાર્ટરમાં લેન્સકાર્ટનો ચોખ્ખો નફો (Net Profit) 131 કરોડ રૂપિયા નોંધાયો છે. જે અગાઉના ક્વાર્ટરમાં 102 કરોડ રૂપિયા હતો. આમ, કંપનીના નફામાં સીધો 28.2% નો વધારો થયો છે.

આવકની વાત કરીએ તો તેમાં પણ મજબૂત ગ્રોથ જોવા મળ્યો છે. કંપનીની આવક 10.1% વધીને 2,096 કરોડ રૂપિયાથી વધીને 2,307 કરોડ રૂપિયા પર પહોંચી ગઈ છે. આ આંકડા દર્શાવે છે કે લેન્સકાર્ટના ચશ્મા અને પ્રોડક્ટ્સનું વેચાણ સતત વધી રહ્યું છે.

કંપનીના ઓપરેટિંગ નફા એટલે કે EBITDA માં પણ 11.8% નો વધારો થયો છે. જે 414.4 કરોડથી વધીને 463.4 કરોડ રૂપિયા થયો છે. કંપનીનું માર્જિન પણ સુધરીને 20.1% થયું છે.

વિદેશમાં કરી મોટી ખરીદી

લેન્સકાર્ટ માત્ર ભારતમાં જ નહીં પણ વિદેશમાં પણ વિસ્તરણ કરી રહી છે. 31 ડિસેમ્બર 2025 સુધીના નવ મહિનાના ગાળામાં લેન્સકાર્ટની સિંગાપોર સ્થિત કંપની (Lenskart Singapore Pte. Ltd.) એ એક મોટી ડીલ કરી છે. તેમણે 'Stellio Ventures S.L' નામની કંપનીમાં 84.21% હિસ્સો ખરીદ્યો છે. આ સોદો આશરે 410.27 કરોડ રૂપિયામાં થયો છે.