Stock Market: નિફ્ટી 24200ની નીચે ખાબક્યો, HDFC અને Axis Bankના ખરાબ પરિણામોથી સેન્સેક્સ 550 પોઈન્ટ તૂટ્યો

Stock Market: ભારતીય શેરબજારમાં આજે શરૂઆતથી જ ભારે વેચવાલીનો માહોલ જોવા મળી રહ્યો છે. Q1ના પરિણામો જાહેર થયા બાદ HDFC બેન્ક અને એક્સિસ બેન્કના શેરોમાં થયેલા મોટા ઘટાડાને કારણે માર્કેટનું સેન્ટિમેન્ટ ખરડાયું છે. આજના ટ્રેડિંગ સેશનમાં સેન્સેક્સમાં સીધો 550 પોઈન્ટનો કડાકો બોલી ગયો છે, જ્યારે નિફ્ટી 24200 ના મહત્વના લેવલની નીચે સરકી ગયો છે.

વોલ સ્ટ્રીટ અને ગ્લોબલ માર્કેટના નબળા સંકેત

સ્થાનિક કારણોની સાથે અમેરિકન બજારોમાંથી પણ કોઈ સારા સંકેત નથી મળી રહ્યા. શુક્રવારે વોલ સ્ટ્રીટમાં મોટો ઘટાડો જોવા મળ્યો હતો. ખાસ કરીને AIના બૂમ સાથે જોડાયેલા શેરોમાં ભારે ધોવાણ થયું હતું. આના કારણે ડાઉ જોન્સ 406.55 પોઈન્ટ એટલે કે 0.77% ઘટીને 52,146.42 ના સ્તર પર બંધ થયો હતો. જ્યારે S&P 500 ઈન્ડેક્સમાં પણ 76.08 પોઈન્ટ (1.01%) નો ઘટાડો થયો હતો અને તે 7,457.69 પર બંધ રહ્યો હતો.

અગાઉના સેશનમાં બજારમાં હતી જબરદસ્ત તેજી

નોંધનીય છે કે, આ ઘટાડા પહેલાના ટ્રેડિંગ સેશનમાં બજારમાં શાનદાર તેજી હતી. ઓટો, ઈન્ફોર્મેશન ટેકનોલોજી અને બેન્કિંગ શેરોમાં જોરદાર ખરીદી થતા સેન્સેક્સ 964.58 પોઈન્ટ (1.25%) ઉછળીને 78,151.45 પર અને નિફ્ટી 261.55 પોઈન્ટ (1.09%) વધીને 24,334.30 ના સ્તરે બંધ થયો હતો. વીતેલા સપ્તાહમાં BSE સેન્સેક્સમાં 0.5% અને નિફ્ટીમાં 0.7% નો વધારો નોંધાયો હતો. જોકે, આજનું ચિત્ર સાવ વિપરીત છે.

માર્કેટ સામેના મોટા પડકારો અને સારી બાબતો

જિયોજિત ઈન્વેસ્ટમેન્ટ્સના ચીફ ઈન્વેસ્ટમેન્ટ સ્ટ્રેટેજિસ્ટ વી.કે. વિજયકુમારના જણાવ્યા અનુસાર, હાલમાં શેરબજાર સામે કેટલાક પડકારો છે તો કેટલાક હકારાત્મક સંકેતો પણ છે.