Redington share price : એપલના નવા iPhone અને iPad લોન્ચ થવાની આશા, Redington નો શેર 17% ઉછળીને બન્યો 'હીરો ઓફ ધ ડે'

Redington share price : શેરબજારમાં શુક્રવારે Redington Limited ના શેરમાં જબરદસ્ત તેજી જોવા મળી છે. આ શેર આજે ઇન્ટ્રાડે ટ્રેડિંગમાં 17% જેટલો ઉછળીને બજારનો 'હીરો' બની ગયો હતો. બપોરે 1 વાગ્યાની આસપાસ આ શેર 30 રૂપિયા (લગભગ 14.50%) ના ઉછાળા સાથે 265 રૂપિયાના લેવલ પર ટ્રેડ કરી રહ્યો હતો. આ શાનદાર તેજીના કારણે BSE સ્મોલકેપ ઇન્ડેક્સમાં રેડિંગ્ટન ટોપ ગેનર બન્યો છે અને કંપનીનું માર્કેટ કેપિટલાઇઝેશન 22,000 કરોડ રૂપિયાને પાર કરી ગયું છે.

શા માટે આવ્યો શેરમાં આટલો મોટો ઉછાળો?

રેડિંગ્ટનના શેરમાં આવેલી આ અચાનક તેજી પાછળનું મુખ્ય કારણ 'Apple' છે. તાજેતરમાં એપલના સીઈઓ ટિમ કૂકે આવતા સોમવારથી પ્રોડક્ટ એનાઉન્સમેન્ટના "મોટા સપ્તાહ" (Big Week) અંગે સંકેત આપતો એક ટીઝર પોસ્ટ કર્યો છે. આ ટીઝર બાદ રોકાણકારો અને ટ્રેડર્સમાં એવી અટકળો તેજ બની છે કે કંપની નવા iPhone મોડલ, રિફ્રેશ્ડ iPad અને અપડેટેડ MacBook લોન્ચ કરી શકે છે. જોકે, કંપનીએ હજુ કોઈ સત્તાવાર વિગતો આપી નથી.

એપલ અને રેડિંગ્ટનનું કનેક્શન શું છે?

રેડિંગ્ટન પોતે એપલના પ્રોડક્ટ્સ બનાવતી નથી, પરંતુ તે પોતાના વિશાળ રિટેલ નેટવર્ક દ્વારા ભારત અને અન્ય ઉભરતા બજારોમાં iPhone, iPad અને MacBooks ની સૌથી મોટી ડિસ્ટ્રીબ્યુટર કંપની છે. આ કંપનીના મોબિલિટી અને કન્ઝ્યુમર ઈલેક્ટ્રોનિક્સ બિઝનેસમાં એપલનો સિંહફાળો છે. આ જ કારણ છે કે જ્યારે પણ એપલ કોઈ નવી પ્રોડક્ટ લોન્ચ કરે છે અથવા ડિમાન્ડ વધે છે, ત્યારે રેડિંગ્ટનના શેરમાં સીધી પોઝિટિવ અસર દેખાય છે.

ભારતમાં એપલનું વધતું પ્રોડક્શન અને રેડિંગ્ટનનો ફાયદો

એપલ હવે તેના કુલ ઉત્પાદનમાંથી 25% iPhones ભારતમાં બનાવી રહ્યું છે. વર્ષ 2025 માં ભારતમાં iPhone નું પ્રોડક્શન 53% વધારવામાં આવ્યું છે. આ સમયગાળામાં 5.5 કરોડ યુનિટ્સ એસેમ્બલ થયા છે, જે 2024 ની સરખામણીમાં 3.6 કરોડ વધુ છે. એપલ વાર્ષિક ધોરણે 22 થી 23 કરોડ આઈફોનનું પ્રોડક્શન કરે છે. ચીન પર નિર્ભરતા ઘટાડવા અને ટેરિફથી બચવા કંપની ભારતમાં પોતાનો વ્યાપ વધારી રહી છે. આ બધી જ બાબતોનો સીધો ફાયદો રેડિંગ્ટનને થઈ રહ્યો છે. કંપનીની કુલ આવકનો 33% હિસ્સો માત્ર એપલ પ્રોડક્ટ્સમાંથી આવે છે. ક્વાર્ટરના આધારે એપલમાંથી થતી આવક 30% થી વધીને 33% થઈ ગઈ છે.