અમેરિકા અને ઈરાન વચ્ચે ફરી વધી રહેલા તણાવની અસર વિશ્વભરના શેરબજારો પર જોવા મળી રહી છે. તેની સીધી અસર ભારતીય શેરબજાર પર પણ પડી છે. આજે બજાર ખુલ્યા બાદ સેન્સેક્સ 1000 પોઈન્ટથી વધુ તૂટ્યો, જ્યારે નિફ્ટી 22,850ની નીચે સરકી ગયો. બ્રોડર માર્કેટમાં પણ ભારે વેચવાલી જોવા મળી હતી. નિફ્ટી મિડકેપ 100 અને નિફ્ટી સ્મોલકેપ 100 બંને 1%થી વધુ ગગડ્યા હતા.
Sharp Market Fall: શેરબજારમાં કડાકો! 5 કારણોથી ₹7 લાખ કરોડનું ધોવાણ, સેન્સેક્સ 1000 પોઈન્ટ તૂટ્યો
અમેરિકા-ઈરાન વચ્ચે વધતા તણાવના કારણે ભારતીય શેરબજારમાં ભારે વેચવાલી જોવા મળી. Sensex ઈન્ટ્રા-ડે 1,000 પોઈન્ટથી વધુ તૂટ્યો, જ્યારે Nifty 22,850ની નીચે સરકી ગયો. BSE પર લિસ્ટેડ કંપનીઓનું માર્કેટ કેપ ₹7 લાખ કરોડથી વધુ ઘટ્યું. ક્રૂડ ઓઈલના વધતા ભાવ, US બોન્ડ યીલ્ડમાં ઉછાળો, FIIsની સતત વેચવાલી અને બેન્કિંગ શેરોમાં ભારે ઘટાડો બજાર તૂટવાના મુખ્ય કારણો રહ્યા.
MoneyControl Newsઅપડેટેડ Sep 28, 2026 પર 12:06 PM
શેરબજારમાં આવેલા આ કડાકાના કારણે BSE પર લિસ્ટેડ કંપનીઓનું માર્કેટ કેપિટલાઇઝેશન ₹7 લાખ કરોડથી વધુ ઘટી ગયું છે. એટલે કે રોકાણકારોની સંપત્તિમાં એક જ દિવસમાં ₹7 લાખ કરોડથી વધુનો ઘટાડો થયો છે.
સેન્સેક્સ-નિફ્ટીની સ્થિતિ
સવારે 10:46 વાગ્યે સેન્સેક્સ 996.88 પોઈન્ટ એટલે કે 1.35% ઘટીને 72,898.86ના સ્તરે ટ્રેડ થઈ રહ્યો હતો. જ્યારે નિફ્ટી 50 309.90 પોઈન્ટ એટલે કે 1.34%ના ઘટાડા સાથે 22,830.60ના સ્તરે હતો. ઈન્ટ્રા-ડે દરમિયાન સેન્સેક્સ 1,026.42 પોઈન્ટ તૂટીને 72,869.32 સુધી પહોંચી ગયો હતો. બીજી તરફ, નિફ્ટી પણ 320.25 પોઈન્ટ ગગડીને 22,820.25 સુધી પહોંચી ગયો હતો.
બજાર કેમ તૂટ્યું? જાણો 5 મોટા કારણો
1. અમેરિકા-ઈરાન વચ્ચે વધ્યો તણાવ
અમેરિકા અને ઈરાન વચ્ચે વધતી તંગદિલીએ વૈશ્વિક બજારોમાં ચિંતા વધારી છે. અમેરિકી રાષ્ટ્રપતિ ડોનાલ્ડ ટ્રમ્પે ઈરાનના સાત દિવસના યુદ્ધવિરામના પ્રસ્તાવને ફગાવી દીધો હોવાના અહેવાલો બાદ જિયોપોલિટિકલ અનિશ્ચિતતા વધી છે. તેની અસર વિશ્વભરના બજારો પર જોવા મળી રહી છે.
2. કાચા તેલના ભાવમાં ઉછાળો
અમેરિકા અને ઈરાન વચ્ચે શાંતિની આશા નબળી પડતાં ક્રૂડ ઓઈલના ભાવમાં જોરદાર ઉછાળો આવ્યો છે. ગ્લોબલ ઓઈલ બેન્ચમાર્ક Brent Crude $98 પ્રતિ બેરલને પાર પહોંચી ગયું છે. ક્રૂડના વધતા ભાવથી મોંઘવારી અને અર્થતંત્ર પર દબાણ વધવાની ચિંતા વચ્ચે શેરબજારમાં પણ વેચવાલી વધી છે.
3. યુએસ બોન્ડ યિલ્ડમાં વધારો
અમેરિકાની 10 વર્ષની બોન્ડ યીલ્ડ 5%થી ઉપર રહી છે. બોન્ડ યીલ્ડમાં વધારો થવાથી રોકાણકારો માટે ઈક્વિટી માર્કેટની આકર્ષકતા પર અસર પડી શકે છે. જેના કારણે શેરબજારમાં સેન્ટિમેન્ટ નબળું પડ્યું છે.
4. FIIsની સતત વેચવાલી
વિદેશી સંસ્થાકીય રોકાણકારો એટલે કે FIIsની સતત વેચવાલી પણ ભારતીય બજાર પર દબાણ વધારી રહી છે.
25 સપ્ટેમ્બરે FIIsએ ભારતીય શેરબજારમાંથી ₹3,693.93 કરોડની નેટ વેચવાલી કરી હતી. તેના એક દિવસ પહેલા, 24 સપ્ટેમ્બરે પણ FIIsએ ₹5,027.36 કરોડના શેર વેચ્યા હતા.
5. બેન્કિંગ શેરોમાં ભારે વેચવાલી
આજે તમામ સેક્ટરના નિફ્ટી ઈન્ડાઈસીસ લાલ નિશાનમાં ટ્રેડ થઈ રહ્યા છે. જોકે, બેન્કિંગ શેરોમાં ભારે વેચવાલીએ બજારના ઘટાડાને વધુ ઊંડો બનાવ્યો છે.
નિફ્ટી PSU બેંક ઇન્ડેક્સ 2%થી વધુ તૂટ્યો છે, જ્યારે નિફ્ટી પ્રાઇવેટ બેંક ઇન્ડેક્સ 1.5%થી વધુ ઘટ્યો છે. આ ઉપરાંત મેટલ અને રિયલ્ટી સેક્ટરના નિફ્ટી ઈન્ડાઈસિસ પણ 1.5%થી વધુ નબળા પડ્યા છે. નિફ્ટી એફએમસીજીમાં પણ લગભગ 1.5%નો ઘટાડો જોવા મળ્યો છે.
માર્કેટ આઉટલુક શું છે?
એનરિચ મનીના સીઈઓ પોનમુડી આર.ના જણાવ્યા અનુસાર, વધતી જિયોપોલિટિકલ અનિશ્ચિતતા અને ક્રૂડ ઓઈલના ભાવમાં ઉછાળાની અસર રોકાણકારોના સેન્ટિમેન્ટ પર પડી છે. તેમના મતે, વૈશ્વિક બોન્ડ યીલ્ડમાં વધારો અને અમેરિકી ડોલરની મજબૂતી ઉભરતા બજારો માટે પડકારરૂપ બની રહી છે. સાથે જ FIIsની સતત વેચવાલી બજાર પર દબાણ વધારી રહી છે.
LKP સિક્યોરિટીઝના વરિષ્ઠ ટેકનિકલ એનાલિસ્ટ રૂપક ડેના જણાવ્યા અનુસાર, નિફ્ટી સતત 'લોઅર હાઇ' અને 'લોઅર લો' બનાવી રહ્યો છે અને મહત્વના મૂવિંગ એવરેજથી નીચે છે. તેનાથી શોર્ટ-ટર્મ ટ્રેન્ડ નબળો હોવાના સંકેત મળી રહ્યા છે.
તેમના જણાવ્યા અનુસાર, વીકલી ચાર્ટ પર RSI પણ બેરિશ થયો છે. લેવલની વાત કરીએ તો 23,000નું સ્તર તાત્કાલિક સપોર્ટ તરીકે મહત્વનું છે, જ્યારે તેની નીચે 22,700નું સ્તર આગામી સપોર્ટ બની શકે છે. બીજી તરફ, 23,200-23,300નો ઝોન મહત્વપૂર્ણ રેઝિસ્ટન્સ છે.
જો નિફ્ટી સતત 23,300ની ઉપર ટકશે, તો ટેક્નિકલ સેટઅપમાં સુધારો જોવા મળી શકે છે. જ્યારે 23,000ની નીચે જવાથી વેચવાલીનું દબાણ ફરી વધી શકે છે, એવુ રૂપક ડેનું વિશ્લેષણ છે.
ડિસ્ક્લેમર: Moneycontrol.com પર આપવામાં આવેલા વિચાર અને રોકાણની સલાહ રોકાણ વિશેષજ્ઞોના પોતાના ખાનગી વિચાર અને સલાહ હોય છે. Moneycontrol યૂઝર્સને સલાહ આપે છે કે તે કોઈ રોકાણ નિર્ણય લેવાના પહેલા સર્ટિફાઈડ એક્સપર્ટથી સલાહ લો.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.