Market Outlook : સળંગ બીજા દિવસે સેન્સેક્સ-નિફ્ટી ઘટાડા સાથે બંધ, જાણો 22 જુલાઈએ કેવો રહેશે બજારનો મિજાજ

Market Outlook : ભારતીય શેરબજારમાં હાલ ઉતાર-ચઢાવનો દોર ચાલી રહ્યો છે. 21 જુલાઈએ સતત બીજા દિવસે માર્કેટમાં ઘટાડાનો માહોલ જોવા મળ્યો હતો. રોકાણકારો હવે એ વાતને લઈને મૂંઝવણમાં છે કે આગામી ટ્રેડિંગ સેશનમાં એટલે કે 22 જુલાઈએ બજારની ચાલ કેવી રહેશે.

સેન્સેક્સ અને નિફ્ટીની ક્લોઝિંગ સ્થિતિ

ટ્રેડિંગ સેશનના અંતે BSE સેન્સેક્સ 238.41 પોઈન્ટ (0.31%) ઘટીને 77,470.11 ના સ્તર પર બંધ થયો હતો. જ્યારે NSE નિફ્ટી 50.80 પોઈન્ટ (0.21%) તૂટીને 24,187.70 પર આવી ગયો હતો, એટલે કે નિફ્ટી ફરી એકવાર 24,200 ની મહત્વની સપાટીથી નીચે રહ્યો છે. બજારમાં એકંદરે મિશ્ર પ્રતિસાદ જોવા મળ્યો, જેમાં 2087 શેરો વધ્યા, 1942 શેરો ઘટ્યા અને 180 શેરોમાં કોઈ ફેરફાર જોવા મળ્યો ન હતો.

કયા શેરો અને સેક્ટરમાં રહી હલચલ?

નિફ્ટી પર HDFC બેન્ક, TCS, રિલાયન્સ ઇન્ડસ્ટ્રીઝ, SBI અને ડો. રેડ્ડીઝ લેબ્સ જેવા મોટા શેરોમાં વેચવાલી જોવા મળી. શ્રીરામ ફાઇનાન્સ, બજાજ ફિનસર્વ, HCL ટેક્નોલોજીસ, આઇશર મોટર્સ અને અલ્ટ્રાટેક સિમેન્ટના શેરોમાં સારી તેજી નોંધાઈ. FMCG, IT, ઓઇલ એન્ડ ગેસ અને PSU બેન્ક સેક્ટરમાં 0.3% થી 0.8% નો ઘટાડો નોંધાયો. તેની સામે ઓટો, મેટલ અને રિયલ્ટી સેક્ટરમાં 0.6% થી 1% સુધીનો ઉછાળો આવ્યો હતો. ખાસ વાત એ રહી કે લાર્જકેપ શેરો ભલે ઘટ્યા, પરંતુ મિડકેપ ઈન્ડેક્સ 0.3% અને સ્મોલકેપ ઈન્ડેક્સ 0.5% ના વધારા સાથે બંધ થયા હતા.

બજાર માટે નિષ્ણાતોનું શું કહેવું છે?

જિયોજિત ઇન્વેસ્ટમેન્ટ્સના રિસર્ચ હેડ વિનોદ નાયરના જણાવ્યા મુજબ, મિડલ ઈસ્ટમાં ભૌગોલિક-રાજકીય તણાવ હોવા છતાં મજબૂત કોર્પોરેટ રિઝલ્ટની આશાએ મિડકેપ શેરો સારું પ્રદર્શન કરી રહ્યા છે. જોકે, લાર્જકેપની સરખામણીમાં મિડકેપનું મોંઘુ વેલ્યુએશન રોકાણકારોને સાવચેત રહેવાનો ઈશારો કરે છે.