Share Market: શરૂઆતી કડાકા બાદ શેરબજારમાં જબરદસ્ત રિકવરી, સેન્સેક્સ 650 પોઈન્ટ ઉછળ્યો, નિફ્ટી 22,900ને પાર

Share Market: 6 એપ્રિલના રોજ એક રોમાંચક ઉતાર-ચઢાવ જોવા મળ્યો. શરૂઆતી કારોબારમાં બજાર લાલ નિશાનમાં ખુલ્યું હતું અને રોકાણકારોમાં નિરાશા હતી. પરંતુ બપોર પડતા જ બજારે જબરદસ્ત કમબેક કર્યું અને સેન્સેક્સ-નિફ્ટી બંને ફરીથી લીલા નિશાનમાં આવી ગયા હતા.

સવારનો કડાકો અને બપોરની શાનદાર રિકવરી

સવારના સેશનમાં બજાર ખૂલ્યા પછી સેન્સેક્સ એક સમયે 590.89 પોઈન્ટ તૂટીને 72,728.66 ના સ્તર પર આવી ગયો હતો. બીજી બાજુ નિફ્ટી પણ 170.15 પોઈન્ટ એટલે કે 0.74% નો ગોતો લગાવીને 22,542.95 ના લેવલ પર પહોંચી ગયો હતો. જોકે, નીચલા સ્તરેથી રોકાણકારોએ ધૂમ ખરીદી શરૂ કરી. બપોરે 2:20 વાગ્યાની આસપાસ બજારનું ચિત્ર સાવ બદલાઈ ગયું હતું. BSE સેન્સેક્સ 662.98 પોઈન્ટ (0.9%)ના શાનદાર ઉછાળા સાથે 73,982.52 ના સ્તર પર ટ્રેડ કરી રહ્યો હતો. જ્યારે નિફ્ટી 208.65 પોઈન્ટ (0.92%) ના જંગી વધારા સાથે 22,921.75 ના લેવલને પાર કરી ગયો હતો.

બજારમાં અચાનક આવેલી તેજીના મુખ્ય 4 કારણો

ઈરાન-અમેરિકા વચ્ચે શાંતિની આશા: વૈશ્વિક બજારમાંથી એક મોટા સમાચાર આવ્યા છે કે ઈરાન અને અમેરિકા વચ્ચે શાંતિ મંત્રણા ચાલી રહી છે. આ ન્યૂઝના કારણે બજારમાં પોઝિટિવ માહોલ બન્યો અને ગ્લોબલ ટેન્શનનો ડર ઓછો થયો.

મજબૂત ભારતીય રૂપિયો: આંતરરાષ્ટ્રીય માર્કેટમાં ભારતીય રૂપિયામાં આવેલી મજબૂતીએ પણ રોકાણકારોનો આત્મવિશ્વાસ વધાર્યો, જેના કારણે બજારને મોટો સપોર્ટ મળ્યો.

મિડકેપ અને સ્મોલકેપમાં તેજી: બ્રોડર માર્કેટમાં પણ સારી ખરીદી જોવા મળી. નિફ્ટી સ્મોલકેપ-100 (Nifty Smallcap-100) અને નિફ્ટી મિડકેપ-100 (Nifty Midcap-100) ઈન્ડેક્સમાં 1% થી વધુનો ઉછાળો જોવા મળ્યો હતો.