Share Market Fall: સળંગ બે દિવસ સુધી શેરબજારમાં જોવા મળેલી તેજી આજે શુક્રવારે અટકી ગઈ છે. શરૂઆતના સત્રમાં IT શેરોમાં ધૂમ ખરીદી અને FIIs (વિદેશી રોકાણકારો) ના સપોર્ટથી બજારમાં સારો એવો ઉછાળો જોવા મળ્યો હતો. પરંતુ, જેમ-જેમ બજાર બંધ થવાનો સમય નજીક આવ્યો, તેમ-તેમ પ્રોફિટ બુકિંગ, ક્રૂડ ઓઈલના વધતા ભાવ અને રૂપિયાની નબળાઈને કારણે વેચવાલીનું ભારે દબાણ જોવા મળ્યું અને બજાર લાલ નિશાનમાં બંધ થયું.
Share Market Fall: બે દિવસની શાનદાર તેજી પર પાણી ફર્યું, સેન્સેક્સ 161 પોઈન્ટ ગગડ્યો; રોકાણકારોના 1.67 લાખ કરોડ ડૂબ્યા
Share Market Fall: શેરબજારમાં આજે મોટો ઘટાડો નોંધાયો છે. નફાવસૂલી, ક્રૂડ ઓઈલના ભાવમાં ઉછાળો અને રૂપિયાના ધોવાણને કારણે સેન્સેક્સ 161 અંક તૂટ્યો. રોકાણકારોએ એક જ દિવસમાં 1.67 લાખ કરોડ રૂપિયા ગુમાવ્યા. જાણો બજાર કેમ તૂટ્યું.
MoneyControl Newsઅપડેટેડ May 15, 2026 પર 4:32 PM
સેન્સેક્સ અને નિફ્ટીની આજની સ્થિતિ
આજના કારોબારના અંતે BSE સેન્સેક્સ 160.73 પોઈન્ટના ઘટાડા સાથે 75,237.99 ના સ્તર પર બંધ થયો હતો. જ્યારે NSE નિફ્ટી 46.10 પોઈન્ટ તૂટીને 23,643.50 પર સેટલ થઈ હતી.
જોકે, દિવસ દરમિયાન બજારમાં સારી એવી વોલેટિલિટી જોવા મળી હતી. એક સમયે સેન્સેક્સ ગઈકાલના બંધથી 471.64 પોઈન્ટ ઉછળીને 75,870.36 ની હાઈ સપાટીએ પહોંચ્યો હતો. તેવી જ રીતે નિફ્ટી પણ 150 પોઈન્ટના જમ્પ સાથે 23,839.30 ના ઉચ્ચ સ્તરે પહોંચી હતી, પણ આ તેજી લાંબો સમય ટકી શકી નહીં.
રોકાણકારોને મોટો ફટકો: 1.67 લાખ કરોડ સ્વાહા
બજારમાં આવેલા આ કડાકાને કારણે રોકાણકારોને રાતા પાણીએ રોવાનો વારો આવ્યો છે. ગુરુવારે BSE પર લિસ્ટેડ કંપનીઓનું કુલ માર્કેટ કેપ 4,62,22,865.061 કરોડ રૂપિયા હતું, જે આજે શુક્રવારે બજાર બંધ થવા પર ઘટીને 4,60,55,384.98 કરોડ રૂપિયા થઈ ગયું છે. સીધા શબ્દોમાં કહીએ તો, એક જ દિવસમાં રોકાણકારોના 1,67,480.081 કરોડ રૂપિયા ડૂબી ગયા છે.
બજારમાં ઘટાડા પાછળના 5 મુખ્ય કારણો:
પ્રોફિટ બુકિંગ: છેલ્લા બે દિવસથી બજારમાં સારી તેજી હોવાથી રોકાણકારોએ ઉચ્ચ સ્તરે નફો રળવાનું (Profit Booking) શરૂ કર્યું, જેનાથી અચાનક વેચવાલી વધી ગઈ.
રૂપિયાનું ઐતિહાસિક ધોવાણ: કરન્સી માર્કેટમાં ડોલર સામે રૂપિયો ભારે દબાણમાં જોવા મળ્યો. શુક્રવારે બપોરે રૂપિયો પહેલીવાર 96.14 પ્રતિ ડોલરના રેકોર્ડ તળિયે પહોંચી ગયો હતો. જોકે, અંતે 30 પૈસાની નબળાઈ સાથે 95.94 પર બંધ થયો હતો. ગ્લોબલ માર્કેટમાં ક્રૂડના વધતા ભાવ અને અમેરિકન નીતિઘડવૈયાઓના કડક નિવેદનોએ રૂપિયાને નુકસાન પહોંચાડ્યું છે.
ક્રૂડ ઓઈલમાં ભડકો: ગ્લોબલ માર્કેટમાં બ્રેન્ટ ક્રૂડના ભાવ 3.20 ટકાના ઉછાળા સાથે 109.20 ડોલર પ્રતિ બેરલ પર પહોંચી ગયા છે. ક્રૂડ મોંઘુ થતાં ફરી એકવાર મોંઘવારી વધવાની ચિંતાએ રોકાણકારોને ડરાવ્યા છે.
એશિયન બજારોમાં કડાકો: માત્ર ભારતીય બજાર જ નહીં, એશિયન બજારોમાં પણ હાહાકાર મચ્યો છે. KOSPI માં 6 ટકાથી વધુનું ગાબડું પડ્યું છે. આ ઉપરાંત નિક્કેઈ 225 માં 3 ટકા, હેંગ સેંગમાં 2 ટકા તેમજ તાઈવાન વેઈટેડ અને શાંઘાઈ કમ્પોઝિટમાં 1 ટકાથી વધુનો ઘટાડો નોંધાયો છે.
જિયો-પોલિટિકલ ટેન્શન (ભૌગોલિક તણાવ): ગ્લોબલ લેવલે રાજકીય અશાંતિની સીધી અસર બજાર પર પડી રહી છે. ગુરુવારે ઈરાનના સૈનિકોએ UAE ના દરિયાકિનારે એક જહાજ કબજે કર્યું હોવાના અહેવાલ છે. બીજી તરફ અમેરિકાએ ઈરાનના 14 મુદ્દાના શાંતિ પ્રસ્તાવને ફગાવી દીધો છે. આ ઉપરાંત ડોનાલ્ડ ટ્રમ્પ અને શી જિનપિંગ વચ્ચેની મીટિંગમાંથી કોઈ નક્કર પરિણામ ન આવતા રોકાણકારો સાવચેત બન્યા છે.
ગુરુવારે કેવો હતો બજારનો મૂડ?
નોંધનીય છે કે, શુક્રવારના કડાકા પહેલા ગુરુવારે બજારમાં શાનદાર તેજી હતી. ગુરુવારે સેન્સેક્સ 789.74 પોઈન્ટ (1.06 ટકા) ના ઉછાળા સાથે 75,398.72 પર અને નિફ્ટી 277 પોઈન્ટ (1.18 ટકા) વધીને 23,689.60 પર બંધ થઈ હતી.
શેરબજાર અત્યારે ગ્લોબલ પરિબળો અને ક્રૂડ ઓઈલની વધઘટ પર ભારે આધાર રાખી રહ્યું છે. જ્યાં સુધી જિયો-પોલિટિકલ ટેન્શન હળવું નહીં થાય અને રૂપિયામાં મજબૂતી નહીં આવે, ત્યાં સુધી બજારમાં આવી જ ઉથલપાથલ (Volatility) જોવા મળી શકે છે. રોકાણકારોએ અત્યારે સમજી વિચારીને આગળ વધવાની જરૂર છે.
Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.