બજારમાં છેલ્લી 35 મિનિટ ભારે પડી: ટોચ પરથી સેન્સેક્સ 600 પોઈન્ટ તૂટ્યો, રોકાણકારોના 1.77 લાખ કરોડ ડૂબ્યા

Sensex-Nifty Closes Red: સળંગ ચાર દિવસની શાનદાર તેજી બાદ આજના શેરબજારમાં રોકાણકારોને નિરાશા સાંપડી છે. નિફ્ટીની વીકલી એક્સપાયરીના દિવસે શરૂઆતી કારોબારમાં માર્કેટ ગ્રીન ઝોનમાં હતું, પરંતુ ટ્રેડિંગની છેલ્લી 35 મિનિટમાં આખો માહોલ બદલાઈ ગયો. આઇટી સેક્ટરે બજારને ઉપર લઈ જવાનો પૂરો પ્રયાસ કર્યો, છતાં રિકવરીની તમામ કોશિશો નિષ્ફળ રહી. આ ભારે ઉતાર-ચઢાવમાં રોકાણકારોના દોઢ લાખ કરોડ રૂપિયાથી વધુ ધોવાઈ ગયા છે.

સેન્સેક્સ અને નિફ્ટીના આજના આંકડા

ઉચ્ચ મથાળેથી ભારે વેચવાલી આવતા બંને મુખ્ય ઇન્ડેક્સ લાલ નિશાનમાં બંધ રહ્યા હતા, ઇન્ટ્રા-ડેમાં સેન્સેક્સ 379.85 પોઈન્ટ ઉછળીને 78,664.92 ની ટોચે પહોંચ્યો હતો. પરંતુ ત્યાંથી 600 પોઈન્ટથી વધુ તૂટીને અંતે 104.35 પોઈન્ટ (0.13%) ના ઘટાડા સાથે 78,180.72 ના સ્તરે બંધ થયો.નિફ્ટી 50 નિફ્ટી 24,500 ની પાર (24,530.90) ગયો હતો, પરંતુ અંતે 31.65 પોઈન્ટ (0.13%) ના ઘટાડા સાથે 24,398.70 ના લેવલ પર બંધ રહ્યો. નાના શેર્સમાં પણ આજે દબાણ જોવા મળ્યું. નિફ્ટી મિડકેપ 100 માં 0.30% ની નબળાઈ આવી, જ્યારે નિફ્ટી સ્મોલકેપ 100 ઇન્ડેક્સ 0.55% તૂટીને બંધ થયો.

કયા સેક્ટરે બજારને બચાવ્યું અને ક્યાં થયું નુકસાન?

આજના દિવસે સેક્ટર મુજબ જોઈએ તો, આઇટી શેર્સમાં સારી એવી ખરીદી રહી. ઇન્ટ્રા-ડેમાં નિફ્ટી આઇટી ઇન્ડેક્સ 4% જેટલો ઉછળ્યો હતો, પણ માર્કેટ બંધ થતી વખતે આ બઢત 2.5% થી ઓછી રહી ગઈ. બીજી બાજુ, મેટલ અને રિયલ્ટી સેક્ટરે માર્કેટ પર મોટું દબાણ ઊભું કર્યું. આજે નિફ્ટી મેટલ 1% થી વધુ અને નિફ્ટી રિયલ્ટી 1.5% થી વધુ તૂટીને બંધ થયા છે.

રોકાણકારોના 1.77 લાખ કરોડ સ્વાહા

શેરબજારમાં આવેલા આ ઘટાડાને કારણે રોકાણકારોને મોટો ફટકો પડ્યો છે.ગઈકાલે BSE પર લિસ્ટેડ તમામ કંપનીઓનું કુલ માર્કેટ કેપ 4,81,50,174.78 કરોડ હતું. આજે માર્કેટ બંધ થતાં તે ઘટીને 4,79,72,766.93 કરોડ થઈ ગયું છે.