Bihar Politics: નીતિશ કુમારે રાજ્યસભા માટે ભર્યું ફોર્મ, CM તરીકેના ઐતિહાસિક કાર્યકાળનો અંત

Bihar Politics: બિહારના રાજકારણમાં અત્યારે એક મોટો બદલાવ જોવા મળી રહ્યો છે. મુખ્યમંત્રી પદ છોડવાની ચાલી રહેલી અટકળો વચ્ચે, નીતિશ કુમારે નીતિન નવીન સાથે રાજ્યસભા માટે પોતાનું નામાંકન (નોમિનેશન) દાખલ કરી દીધું છે.

અમિત શાહની હાજરીમાં ઉમેદવારી

ફોર્મ ભર્યા બાદ નીતિશ કુમાર પોતાના નિવાસસ્થાને પહોંચ્યા હતા. નોંધનીય છે કે, બિહારથી NDA ના રાજ્યસભાના ઉમેદવારોએ કેન્દ્રીય ગૃહમંત્રી અમિત શાહની હાજરીમાં પોતાના ફોર્મ ભર્યા હતા. જેમાં નીતિશ કુમાર અને નીતિન નવીન ઉપરાંત ઉપેન્દ્ર કુશવાહા અને શિવેશ કુમારનો પણ સમાવેશ થાય છે. આ કાર્યક્રમ પછી અમિત શાહ સ્ટેટ ગેસ્ટ હાઉસ ગયા હતા, જ્યાં ભાજપના નેતાઓ સાથે તેમની બેઠકોનો દોર શરૂ થઈ ગયો છે.

10 વખત મુખ્યમંત્રી રહેવાનો રેકોર્ડ

રાજ્યસભામાં ઉમેદવારી નોંધાવવાની સાથે જ બિહારમાં સૌથી લાંબા સમય સુધી મુખ્યમંત્રી રહેલા નીતિશ કુમારના ઐતિહાસિક શાસનનો અંત આવશે. તમને જણાવી દઈએ કે, નીતિશ કુમાર વર્ષ 2005 થી લઈને અત્યાર સુધીમાં રેકોર્ડ 10 વખત બિહારના મુખ્યમંત્રી રહ્યા છે.

સોશિયલ મીડિયા પર ભાવુક પોસ્ટ

નીતિશ કુમારે સોશિયલ મીડિયા પ્લેટફોર્મ 'X' પર એક પોસ્ટ કરીને બિહારની જનતાનો હૃદયપૂર્વક આભાર માન્યો હતો. તેમણે લખ્યું, "છેલ્લા બે દાયકાથી વધુ સમયથી તમે મારા પર જે અતૂટ વિશ્વાસ અને સમર્થન દર્શાવ્યું છે, તેના બળે જ મેં પૂરા સમર્પણથી બિહારની સેવા કરી છે. તમારા સાથના કારણે જ આજે બિહાર વિકાસ અને સન્માનની નવી ઓળખ ઊભી કરી શક્યું છે."