Government taxi service: આવી રહી છે સરકારી ટેક્સી સર્વિસ, ઉબેર-ઓલાને મળશે ટક્કર, અમિત શાહે કરી જાહેરાત

Government taxi service: સંસદમાં પોતાના સંબોધન દરમિયાન અમિત શાહે વડાપ્રધાન નરેન્દ્ર મોદીના "સહકારથી સમૃદ્ધિ" વિઝનની પ્રશંસા કરી. તેમણે કહ્યું કે, "આ માત્ર એક નારો નથી, પરંતુ એક દૂરંદેશી વિઝન છે, જે દેશના નાગરિકો અને ખાસ કરીને નાના વ્યવસાયીઓ તથા કામદારોને આર્થિક રીતે સશક્ત બનાવવા માટે કામ કરે છે." તેમણે વધુમાં જણાવ્યું કે આ સરકારી ટેક્સી સર્વિસ ડ્રાઇવરોને વધુ આર્થિક લાભ આપવા ઉપરાંત ગ્રાહકો માટે પણ સસ્તી અને વિશ્વસનીય સર્વિસ પૂરી પાડશે.

આ યોજના હેઠળ સરકારનો ઉદ્દેશ્ય એવું માળખું તૈયાર કરવાનો છે જેમાં ડ્રાઇવરોને તેમની કમાણીનો મોટો હિસ્સો મળી શકે. હાલમાં ખાનગી કેબ સર્વિસઓમાં ડ્રાઇવરોને કંપનીઓ દ્વારા નોંધપાત્ર કમિશન ચૂકવવું પડે છે, જેના કારણે તેમની આવક પર અસર પડે છે. સરકારી સર્વિસમાં આ સમસ્યાને દૂર કરવાનો પ્રયાસ કરવામાં આવશે. આ ઉપરાંત, સહકારી મોડલ હોવાથી આ સર્વિસ સ્થાનિક સ્તરે રોજગારીની તકો પણ વધારશે.

અમિત શાહે આ પહેલને "ગેમ ચેન્જર" ગણાવી અને કહ્યું કે આનાથી ન માત્ર ડ્રાઇવરોનું જીવન સુધરશે, પરંતુ ગ્રાહકોને પણ વધુ સારી અને પોસાય તેવી સર્વિસ મળશે. આ યોજનાની વધુ વિગતો હજુ સામે આવવાની બાકી છે, પરંતુ સરકારે ટૂંક સમયમાં તેના અમલીકરણની તૈયારીઓ શરૂ કરી દીધી હોવાનું સૂત્રોએ જણાવ્યું છે.

ડ્રાઇવરોને મળશે આ લાભો

કમિશનમાં ઘટાડો: ઓલા અને ઉબેર જેવા પ્લેટફોર્મ ડ્રાઇવરો પાસેથી 20-30% સુધી કમિશન વસૂલે છે, જ્યારે સરકારી કો-ઑપરેટિવ મોડલમાં આ દર નોંધપાત્ર રીતે ઓછો હશે.

બહેતર વીમો અને સુરક્ષા: ડ્રાઇવરોને સામાજિક સુરક્ષા મળશે, જેમાં આરોગ્ય વીમો, અકસ્માત વીમો અને પેન્શન જેવી સુવિધાઓનો સમાવેશ થશે.

લાભમાં સીધી ભાગીદારી: આ મોડલમાં નફાનો એક હિસ્સો ડ્રાઇવરોને મળશે, જેનાથી તેમની આવકમાં વધારો થશે.