Lok Sabha Polls 2024: મણિપુરમાં 11 મતદાન મથકો પર 22 એપ્રિલે ફરી મતદાન

Lok Sabha Polls 2024: ઇનર મણિપુર લોકસભા મતવિસ્તારમાં 11 મતદાન મથકો પર 22 એપ્રિલે પુનઃ મતદાન યોજાશે. મણિપુરના મુખ્ય ચૂંટણી અધિકારીએ આ જાહેરાત કરી છે. આ નિર્ણય ચૂંટણી પંચના નિર્દેશો પર આવ્યો છે, જેણે આ મતદાન મથકો પર 19 એપ્રિલે યોજાયેલા મતદાનને અમાન્ય જાહેર કરવા અને નવેસરથી મતદાન કરાવવાનું કહ્યું હતું. અધિકારીએ જણાવ્યું કે જે મતદાન મથકો પર ફરીથી મતદાન કરવામાં આવશે તેમાં ખુરાઈ મતવિસ્તારના મોઈરાંગકમ્પુ સાઝેબ અને થોંગમ લીકાઈ, ક્ષેત્રીગાવમાં 4, ઈમ્ફાલ પૂર્વ જિલ્લાના થોંગજુમાં 1, ઉરીપોકમાં 3 અને ઈમ્ફાલ પશ્ચિમ જિલ્લાના કોંથૌજામનો સમાવેશ થાય છે.

વંશીય સંઘર્ષગ્રસ્ત મણિપુરમાંથી કેટલાક મતદાન મથકો પર ફાયરિંગ, ધાકધમકી, EVMની તોડફોડ અને મતદાન મથકો કબજે કરવાના કિસ્સા નોંધાયા હતા. મણિપુરની બે લોકસભા બેઠકો, ઇનર મણિપુર અને આઉટર મણિપુર, માટે પ્રથમ તબક્કામાં શુક્રવાર, 19 એપ્રિલના રોજ મતદાન થયું હતું અને 72 ટકા મતદારોએ તેમના મતાધિકારનો ઉપયોગ કર્યો હતો.

કોંગ્રેસે 47 મતદાન મથકો પર ફરી મતદાનની માંગ કરી હતી

શુક્રવારે મણિપુરની બે લોકસભા બેઠકો માટે મતદાન દરમિયાન, કોંગ્રેસે ચૂંટણીમાં ગોટાળા અને બૂથ કબજે કરવાનો આરોપ મૂક્યો હતો અને 47 મતદાન મથકો પર ફરીથી મતદાનની માંગ કરી હતી. કોંગ્રેસના મણિપુર એકમના પ્રમુખ કે. મેઘચંદ્રએ કહ્યું કે પાર્ટીએ મણિપુરના મુખ્ય ચૂંટણી અધિકારીને ફરિયાદ કરી છે અને 'ઇનર મણિપુર' મતવિસ્તારના 36 મતદાન મથકો અને 'આઉટર મણિપુર' મતવિસ્તારમાં 11 મતદાન મથકો પર ફરીથી મતદાન કરાવવાની માંગ કરી છે.