ગાંધીનગરમાં ITની મોટી કાર્યવાહી: ત્રણ સ્થળોએ દરોડા, બિનમાન્યતા પ્રાપ્ત રાજકીય પક્ષ પર સકંજો

Income Tax Raid: ગુજરાતમાં રજિસ્ટર્ડ, પરંતુ માન્યતા પ્રાપ્ત ન હોય તેવા રાજકીય પક્ષોની ઊંચી આવકને લઈને દેશભરમાં મોટો વિવાદ ઊભો થયો છે. એસોસિયેશન ફોર ડેમોક્રેટિક રિફોર્મ્સ (ADR)ના રિપોર્ટ મુજબ, દેશના ટોચના 10 સૌથી વધુ કમાણી કરતા આવા પક્ષોમાં ગુજરાતના પાંચ પક્ષોનો સમાવેશ થાય છે. આ પાંચ પક્ષોમાં 'ભારતીય નેશનલ જનતા દળ' રૂપિયા 957 કરોડની આવક સાથે ટોચ પર છે. આ જ પક્ષના સ્થાપક સંજય વિઠ્ઠલભાઈ ગજેરાના ગાંધીનગર સ્થિત નિવાસસ્થાને બુધવાર 12 નવેમ્બરના રોજ વહેલી સવારે ઈન્કમ ટેક્સની ટીમે દરોડા પાડ્યા છે.

નાણાંકીય ગણિત અને પક્ષોનો દરજ્જો

જે પક્ષોને ચૂંટણીમાં ખૂબ ઓછા મત મળે છે, તેમને 'રજિસ્ટર્ડ અમાન્ય' (Registered Unrecognised) પક્ષો કહેવાય છે. આ પક્ષો ચૂંટણી પંચમાં રજિસ્ટર્ડ હોય છે, પરંતુ ઓછા મતો મળવાને કારણે તેમને માન્યતા પ્રાપ્ત ગણવામાં આવતા નથી. છેલ્લા 5 વર્ષમાં યોજાયેલી બે લોકસભા અને એક વિધાનસભા ચૂંટણીમાં ગુજરાતના આવા પાંચ પક્ષોએ કુલ 17 ઉમેદવાર ઊભા રાખ્યા હતા, તેમ છતાં તેમને માત્ર 22,000 મત જ મળ્યા હતા.

ADRના રિપોર્ટના આંકડા જોઈએ તો, વર્ષ 2019-20 થી 2023-24 દરમિયાન આ 5 પક્ષોની કુલ આવક રૂપિયા 2,316 કરોડ છે, જ્યારે એક વર્ષની સરેરાશ આવક રૂપિયા 1,158 કરોડ છે. આટલા ઓછા જનાધાર સામે આટલી મોટી આવક ઊભી થતાં આ પક્ષો શંકાના ઘેરામાં આવ્યા છે.

ITના દરોડાની વિગતો

સૌથી વધુ કમાણી કરનાર પક્ષ 'ભારતીય નેશનલ જનતા દળ'ના સ્થાપક સંજય વિઠ્ઠલભાઈ ગજેરાના ગાંધીનગરના નિવાસ સ્થાને બુધવારે વહેલી સવારે ઇન્કમ ટેક્સના અધિકારીઓની પાંચ ગાડીઓ સાથેની ટીમે દરોડો પાડ્યો હતો. આ મુખ્ય દરોડા ઉપરાંત, આઇટી ટીમે અન્ય બે સ્થળોએ પણ કાર્યવાહી હાથ ધરી છે, જેમાં સંજય ગજેરાની સેકટર-11, મેઘ મલ્હાર કોમ્પ્લેક્સ ખાતે આવેલી ઓફિસ અને તેમના ડ્રાઇવરના ગ્રીન સિટીનું મકાન પર રેડ પડી હતી.

હાલમાં સંજય ગજેરાના ઘરે આઇટીની ટીમ દ્વારા દસ્તાવેજો, સ્થાવર અને જંગમ મિલકત સહિતના પુરાવાઓની સઘન ચકાસણી હાથ ધરવામાં આવી રહી છે. આ દરોડા 'રજિસ્ટર્ડ અમાન્ય' રાજકીય પક્ષોની ઊંચી આવક અને તેના નાણાંકીય વ્યવહારોની સચ્ચાઈ જાણવા માટેના પગલાં તરીકે જોવામાં આવી રહ્યા છે.