નેહા બોરાના 'બાંગ્લાદેશ મોડલ' વાળા નિવેદન પર ભારે બબાલ, ભાજપનો પ્રહાર, કહ્યું- આ ભારતમાં લોકશાહી ખતમ કરવાનું કાવતરું છે

દેશમાં ચૂંટણી પંચના નિર્ણયો અને વોટિંગને લઈને રાજકીય દંગલ ચાલી રહ્યું છે. આ માહોલ વચ્ચે AISAના અધ્યક્ષ નેહા બોરાના એક નિવેદને મોટો રાજકીય ભૂકંપ લાવી દીધો છે. નેહા બોરાએ એવું નિવેદન આપ્યું છે કે, "બાંગ્લાદેશે ક્રાંતિનો નવો રસ્તો બતાવ્યો છે." આ નિવેદન બાદ ભારતીય જનતા પાર્ટી આક્રમક બની છે અને તેને ભારતમાં લોકશાહીને ખતમ કરવાના મોટા ષડયંત્ર તરીકે ગણાવ્યું છે.

રાહુલ ગાંધી અને નેહા બોરાનું કનેક્શન

મુખ્ય ચૂંટણી કમિશનર જ્ઞાનેશ કુમાર અને SIR વિરુદ્ધ કોંગ્રેસ નેતા રાહુલ ગાંધીએ હાલમાં જ સુપ્રીમ કોર્ટ સુધી એક માર્ચ કાઢી હતી. આ માર્ચમાં રાહુલ ગાંધીએ નેહા બોરાને ખાસ આગળ કર્યા હતા અને પોતાની 'ટી પાર્ટી' માં પણ આમંત્રણ આપ્યું હતું. પરંતુ હવે એ જ નેહા બોરાના નિવેદને રાહુલ ગાંધી અને વિપક્ષ માટે નવી મુસીબત ઊભી કરી દીધી છે. ભાજપ હવે નેહા બોરાની સાથે સાથે રાહુલ ગાંધીને પણ સીધા ટાર્ગેટ કરી રહ્યું છે.

નેહા બોરાએ શું કહ્યું હતું?

નેહા બોરાએ પોતાના નિવેદનમાં ભારતમાં ચાલી રહેલા SIR વિરોધી પ્રદર્શનને સીધું બાંગ્લાદેશમાં થયેલા હિંસક આંદોલન સાથે જોડી દીધું છે. તેમણે કહ્યું હતું કે, બાંગ્લાદેશના આંદોલને દુનિયાના Gen-Zને એક નવો રસ્તો બતાવ્યો છે. બાંગ્લાદેશની લડાઈ લોકશાહી અને વોટના અધિકાર માટે હતી, અને ભારતનું Gen-Z પણ અત્યારે લોકશાહી અને વોટના અધિકાર માટે જ લડી રહ્યું છે. નેહાએ દાવો કર્યો કે ભારતના યુવાઓને બાંગ્લાદેશથી જ પ્રેરણા મળી છે.

ભાજપનો પલટવાર: 'આ લોકશાહી તબાહ કરવાનું કાવતરું છે'

આ નિવેદન સામે આવતા જ ભાજપ એક્શન મોડમાં આવી ગયું છે. ભાજપના રાષ્ટ્રીય પ્રવક્તા પ્રદીપ ભંડારીએ આકરી પ્રતિક્રિયા આપતા કહ્યું કે, રાહુલ ગાંધી અને નેહા બોરાની વિચારસરણી બિલકુલ એક જ છે. તેમણે સ્પષ્ટ આરોપ લગાવતા કહ્યું કે, "કોંગ્રેસ અને તેમના સાથીઓને લોકશાહી ઢબે રાજકીય વિરોધ કરવામાં કોઈ જ રસ નથી, પરંતુ તેઓ ભારતમાં સત્તા પરિવર્તન લાવવા માટે કોઈપણ હદે જવા તૈયાર છે."