‘હિન્દુ જાગશે તો જ દુનિયા જાગશે': કેનેડામાં RSS ચીફ મોહન ભાગવતના નિવેદનથી ભારે ચર્ચા, જાણો શું કહ્યું

વિવિધતામાં એકતા: ભાગવતે કહ્યું કે ભારતમાં ભિન્નતાને ક્યારેય અડચણ માનવામાં આવતી નથી. આપણી સંસ્કૃતિ લોકોને વિવિધતામાં એકતા જોતા શીખવે છે અને આ વિવિધતા એ જ આપણી ખરી તાકાત છે.

ભારત 'વિશ્વગુરુ' છે, શાસક મહાસત્તા નહીં: ભારત ભૂતકાળમાં પણ મહાસત્તા હતું, પણ તેણે ક્યારેય એવો ઘમંડ કર્યો નથી. ભારતે હંમેશા પોતાના ઉચ્ચ ચરિત્ર અને સેવાભાવથી વિશ્વગુરુ તરીકેની ઓળખ બનાવી છે, કોઈ પર રાજ કરવા માટે નહીં.

સેવા એ ભારતનો DNA છે: તેમણે કહ્યું કે અન્યોને મદદ કરવી એ ભારતની જૂની પરંપરા છે. ભારતે ક્યારેય કોઈને મદદ કરવાની ના પાડી નથી, વગર માંગ્યે પણ આપણે સહાયનો હાથ લંબાવ્યો છે.

ભારતીયોએ જ્ઞાન વહેંચ્યું, કોઈ દેશ પર કબ્જો નથી કર્યો

પોતાના સંબોધનમાં ભારતનો ભવ્ય ઇતિહાસ યાદ કરતા મોહન ભાગવતે કહ્યું કે, આપણા પૂર્વજોએ મેક્સિકોથી લઈને સાઇબિરીયા, ચીન અને મંગોલિયા સુધી પગપાળા અને નાની હોડીઓમાં દક્ષિણ-પૂર્વ એશિયાનો પ્રવાસ ખેડ્યો હતો. તેમનો મુખ્ય હેતુ દુનિયામાં જ્ઞાન વહેંચવાનો હતો. ભારતે ક્યારેય કોઈ દેશ પર આક્રમણ કરીને તેને જીત્યો નથી કે કોઈનું ધર્માંતરણ કરાવ્યું નથી.

કાર્યક્રમમાં 2500થી વધુ લોકોની હાજરી

આ ભવ્ય કાર્યક્રમનું આયોજન 'કેનેડિયન હિન્દુઝ ફોર આઉટરીચ, રિલેશન્સ એન્ડ ડાયલોગ' (CHORD) દ્વારા કરવામાં આવ્યું હતું. CHORDના આયોજક નરેશ ચાવડાના જણાવ્યા અનુસાર, કેનેડાના 8 અલગ-અલગ પ્રાંતોમાંથી 2500થી વધુ હિન્દુઓએ આ કાર્યક્રમમાં ભાગ લીધો હતો.

આ કાર્યક્રમમાં કેનેડાના પૂર્વ સંરક્ષણ મંત્રી અને આલ્બર્ટાના પૂર્વ પ્રીમિયર જેસન કેની પણ ખાસ હાજર રહ્યા હતા. તેમણે કેનેડા અને ભારત વચ્ચેના સંબંધોની નવી અને સકારાત્મક શરૂઆતનું ઉષ્માભેર સ્વાગત કર્યું હતું. આ ઉપરાંત, કેનેડિયન રોયલ એરફોર્સના પૂર્વ અધિકારી કાર્તિક ત્રિવેદીએ પણ મોહન ભાગવતની આ મુલાકાત અને તેમની હાજરીને ખૂબ જ મહત્વની ગણાવી હતી.

મોહન ભાગવતે કેનેડાની ધરતી પરથી સ્પષ્ટ સંદેશ આપ્યો છે કે ભારતીય સંસ્કૃતિ અને હિન્દુ ધર્મનો મૂળ ઉદ્દેશ્ય દુનિયાને સાથે લઈને ચાલવાનો અને વૈશ્વિક ભાઈચારો (વૈશ્વિક બંધુત્વ) વધારવાનો છે. હિન્દુઓ જાગૃત થશે તો જ દુનિયામાં સાચા અર્થમાં શાંતિ અને માનવતાનો વ્યાપ વધશે.

આ પણ વાંચો- નેપાળમાં જળપ્રલય બાદ ફરી પૂરનો ખતરો: ભોટેકોશી નદીમાં જળસ્તર વધતા હાઈ એલર્ટ, 788ના મોત અને હજારો લાપતા