જાપાનમાં એક બેન્ક કર્મચારીનું મન બગડ્યું, હવે અધિકારીઓ ભોગવી રહ્યા છે પરિણામ, કાપવામાં આવશે પગાર

જાપાનની એક મોટી બેન્કના કર્મચારીએ કસ્ટમર્સના લોકરમાંથી લગભગ 1.4 અબજ યેન (9 મિલિયન યુએસ ડોલર) ચોરી લીધા. કર્મચારીની ચોરીના આરોપસર ધરપકડ કરવામાં આવી હતી, ત્યારબાદ બેન્કના ઉચ્ચ અધિકારીઓએ આ ઘટના માટે માફી માંગી હતી. આ બધા વચ્ચે આશ્ચર્યજનક વાત એ છે કે બેન્ક અધિકારીઓએ તેમના પગારમાં ઘટાડો કરવાનો નિર્ણય લીધો છે. MUFG બેન્કની બે શાખાઓમાં થયેલી આ ચોરીઓ ચાર વર્ષના સમયગાળામાં કરવામાં આવી હતી અને આ મામલો ગયા વર્ષે ઓક્ટોબરમાં પ્રકાશમાં આવ્યો હતો.

બેન્કે માફી માંગી

જે બેન્કના અધિકારીઓએ તેમના પગારમાં ઘટાડો કરવાનો નિર્ણય લીધો છે તેમાં તેના ચેરમેન નાઓકી હોરી, ચીફ એક્ઝિક્યુટિવ ઓફિસર જુન'ચી હંઝાવા અને મેનેજિંગ એક્ઝિક્યુટિવ ઓફિસર તાદાશી યામામોટોનો સમાવેશ થાય છે. તે દરેક અધિકારીઓના પગારમાં ત્રણ મહિનામાં 30 ટકાનો ઘટાડો કરવામાં આવશે. ત્રણ મહિનામાં બે અન્ય અધિકારીઓના પગારમાં 20 ટકાનો ઘટાડો કરવામાં આવશે. બેન્કે એક નિવેદનમાં કહ્યું, ‘કસ્ટમર્સ અને હિસ્સેદારોને થયેલી અસુવિધા બદલ અમે દિલગીર છીએ.'

પોલીસ કરી રહી છે તપાસ

બેન્કના જણાવ્યા અનુસાર, બરતરફ કરાયેલા કર્મચારીએ લગભગ 60 લોકરમાંથી 1.4 અબજ યેન (જાપાની ચલણ) મૂલ્યનું સોનું, રોકડ અને અન્ય કિંમતી વસ્તુઓની ચોરી કરી હતી. જાપાનની ત્રણ સૌથી મોટી બેન્કોમાંની એક, આ બેન્કની સ્થાપના 2006માં UFJ બેન્ક અને બેન્ક ઓફ ટોક્યો-મિત્સુબિશીના વિલીનીકરણ દ્વારા કરવામાં આવી હતી. ટોક્યો પોલીસે કર્મચારીની ઓળખ યુકારી ઇવામુરા તરીકે કરી હતી, જેણે યામાઝાકી નામનો પણ ઉપયોગ કર્યો હતો. મંગળવારે બે કસ્ટમર્સના લોકરમાંથી અલગ અલગ પ્રસંગોએ 20 સોનાના લગડી ચોરવાના શંકાસ્પદ આરોપસર તેની ધરપકડ કરવામાં આવી હતી. પોલીસે જણાવ્યું કે આ મામલાની તપાસ કરવામાં આવી રહી છે.

આ પણ વાંચો - ‘માર્ગ અકસ્માતોમાં ભારત પ્રથમ ક્રમે', બધા કોન્ટ્રાક્ટરો અને એન્જિનિયરોએ ધ્યાનથી સાંભળે ગડકરીના આ નિવેદનને