દેશમાં દર 8 મિનિટે એક બાળક ગુમ! સુપ્રીમ કોર્ટની લાલ આંખ, સરકારને કહ્યું 'આ અત્યંત ગંભીર મુદ્દો'

Supreme Court Alarmed: ભારતમાં બાળકોના ગુમ થવાના આંકડા એટલા ભયાનક છે કે ખુદ સુપ્રીમ કોર્ટે પણ તેના પર ઊંડી ચિંતા વ્યક્ત કરી છે. એક રિપોર્ટ અનુસાર, દેશમાં દર 8 મિનિટે એક બાળક ગુમ થાય છે. આ ચોંકાવનારા આંકડા સામે આવ્યા બાદ, સુપ્રીમ કોર્ટે આ મુદ્દાને "અત્યંત ગંભીર" ગણાવ્યો છે અને કેન્દ્ર સરકારને આ મામલે તાત્કાલિક પગલાં લેવા માટે કડક નિર્દેશ આપ્યા છે. મંગળવાર, 18 નવેમ્બરના રોજ થયેલી સુનાવણી દરમિયાન જસ્ટિસ બી. વી. નાગરત્ના અને જસ્ટિસ આર. મહાદેવનની બેન્ચે આ મુદ્દા પર સરકારની ઝાટકણી કાઢી હતી.

જટિલ દત્તક પ્રક્રિયા ગેરકાયદે પ્રવૃત્તિને આપે છે પ્રોત્સાહન

સુનાવણી દરમિયાન જસ્ટિસ બી. વી. નાગરત્નાએ સ્પષ્ટ શબ્દોમાં કહ્યું, "મેં સમાચારમાં વાંચ્યું કે ભારતમાં દર 8 મિનિટે એક બાળક ગુમ થાય છે. આ સાચું છે કે નહીં તે મને ખબર નથી, પરંતુ જો આ સાચું હોય તો તે એક ખૂબ જ ગંભીર મુદ્દો છે."

તેમણે વધુમાં ટિપ્પણી કરી કે દેશમાં બાળક દત્તક લેવાની પ્રક્રિયા એટલી જટિલ અને લાંબી છે કે લોકો પરેશાન થઈને બાળકો મેળવવા માટે ગેરકાયદેસર માર્ગો અપનાવે છે. આ જટિલતાને કારણે બાળ તસ્કરી જેવી ગેરકાયદેસર પ્રવૃત્તિઓને પ્રોત્સાહન મળે છે. કોર્ટે સ્પષ્ટપણે કહ્યું કે બાળક દત્તક લેવાની પ્રક્રિયાને તાત્કાલિક ધોરણે સરળ બનાવવી જોઈએ.

સરકારને કડક આદેશ: '9 ડિસેમ્બર સુધીમાં કામગીરી પૂર્ણ કરો'

આ પહેલા 14 ઑક્ટોબરે પણ સુપ્રીમ કોર્ટે કેન્દ્ર સરકારને તમામ રાજ્યો અને કેન્દ્રશાસિત પ્રદેશોમાં ગુમ થયેલા બાળકોના કેસ માટે એક-એક નોડલ અધિકારીની નિમણૂક કરવાનો આદેશ આપ્યો હતો. આ અધિકારીઓની વિગતો 'મિશન વાત્સલ્ય' પોર્ટલ પર અપડેટ કરવાની હતી.

આ મામલે કેન્દ્ર સરકાર તરફથી હાજર એડિશનલ સોલિસિટર જનરલ ઐશ્વર્યા ભાટીએ નોડલ અધિકારીઓની નિમણૂક માટે 6 અઠવાડિયાનો સમય માંગ્યો હતો. જોકે, કોર્ટે વધુ સમય આપવાનો સ્પષ્ટ ઇનકાર કરી દીધો અને કેન્દ્રને 9 ડિસેમ્બર સુધીમાં આ પ્રક્રિયા પૂર્ણ કરવાનો કડક આદેશ આપ્યો.