બીજેપી સાંસદ રવિ કિશનની પુત્રી બની 'અગ્નવીર', અગ્નિપથ યોજના હેઠળ ભારતીય સેનામાં જોડાઈ

ભોજપુરી ફિલ્મના સુપરસ્ટાર અને ગોરખપુરના ભારતીય જનતા પાર્ટી (BJP)ના સાંસદ રવિ કિશનની પુત્રી ઈશિતા શુક્લા અગ્નિપથ યોજના હેઠળ ભારતીય સેનામાં જોડાઈ છે. ઈશિતા હાલમાં જ ડિફેન્સ ફોર્સમાં જોડાઈ છે. આ સારા સમાચાર બાદ રવિ કિશનને સોશિયલ મીડિયા પર ચારે બાજુથી અભિનંદન મળી રહ્યા છે. લોકો બહાદુર ઈશિતાને શુભેચ્છા પાઠવી રહ્યા છે. જણાવી દઈએ કે કેન્દ્ર સરકારે ગયા વર્ષે જૂનમાં સશસ્ત્ર દળોની ભરતી પ્રક્રિયામાં ફેરફાર લાવવા માટે આ જાહેરાત કરી હતી. કેન્દ્ર સરકાર દ્વારા ગયા વર્ષે શરૂ કરવામાં આવેલી અગ્નિપથ ભરતી યોજના હેઠળ, માત્ર 25 ટકા અગ્નિવીરોને ચાર વર્ષ પૂરા થયા પછી બળમાં જાળવી રાખવામાં આવશે, જ્યારે બાકીના નિવૃત્ત થશે.

રવિ કિશનની દીકરી 21 વર્ષની છે. આ સમાચાર સોશિયલ મીડિયા પર ઝડપથી વાયરલ થઈ રહ્યા છે. સેલિબ્રિટી ફોટોગ્રાફર વરિન્દર ચાવલાએ પણ પોતાના ઈન્સ્ટાગ્રામ એકાઉન્ટ પર આ સમાચાર શેર કર્યા છે. તેણે ઈશિતા અને રવિ કિશનની તસવીર સાથે લખ્યું, "ભોજપુરી એક્ટર રવિ કિશનની 21 વર્ષની દીકરી ઈશિતા શુક્લા અગ્નિપથ સ્કીમ હેઠળ ડિફેન્સ ફોર્સમાં જોડાશે. થોડા દિવસો પહેલા તેના સેનામાં જોડાવાના સમાચાર આવ્યા હતા."

જણાવી દઈએ કે ઈશિતા NCC કેડેટ રહી ચુકી છે. આ પછી, સશસ્ત્ર દળોમાં જોડાવાનો તેમનો નિર્ણય સામે આવ્યો છે. એનસીસી કેડેટ તરીકે તે સશસ્ત્ર દળોની શિસ્તને સારી રીતે સમજે છે. તે લશ્કરી વાતાવરણથી પરિચિત છે. તેણે આ વર્ષે 'રિપબ્લિક ડે' પરેડમાં પણ ભાગ લીધો હતો. રાજપથ પર તેમના પગલાની સૌએ પ્રશંસા કરી હતી. ત્યારે રવિ કિશને ટ્વિટ કરીને પુત્રીની આ ઉપલબ્ધિ પર ખુશી વ્યક્ત કરી હતી.

ટ્વિટર યુઝર્સે રવિ કિશનને અભિનંદન પાઠવ્યા હતા અને સેલિબ્રિટીની પુત્રી હોવા છતાં અલગ કારકિર્દી પસંદ કરવા બદલ ઈશિતાની પ્રશંસા કરી હતી. ઈશિતા શુક્લા અત્યારે 21 વર્ષની છે. તેમનો જન્મ ઉત્તર પ્રદેશના જૌનપુરમાં થયો હતો. તેણે દિલ્હી યુનિવર્સિટીની રાજધાની કોલેજમાંથી અભ્યાસ પૂર્ણ કર્યો છે. તેમને વર્ષ 2022માં NCCનો ADG એવોર્ડ ઑફ એક્સલન્સ એનાયત કરવામાં આવ્યો હતો. કર્નલ રાજ્યવર્ધન સિંહ રાઠોડ દ્વારા તેમને શ્રેષ્ઠ કેડેટનો એવોર્ડ આપવામાં આવ્યો હતો.