અગ્નિવીરો માટે દિવાળી પહેલા મોટી ખુશખબરી! નોકરીનો સમયગાળો 2 વર્ષ વધી શકે છે, સરકાર ટૂંક સમયમાં લેશે મોટો નિર્ણય

Agniveer Scheme News: ભારતીય થલ સેના, નૌકાદળ અને વાયુસેનામાં 'અગ્નિપથ યોજના' હેઠળ ભરતી થયેલા અગ્નિવીરો માટે એક ખૂબ જ સારા સમાચાર સામે આવી રહ્યા છે. તાજેતરના અહેવાલો અનુસાર, કેન્દ્ર સરકાર અગ્નિવીરોની નોકરીનો સમયગાળો વધુ 2 વર્ષ લંબાવવા પર ગંભીરતાથી વિચારણા કરી રહી છે. આ પ્રસ્તાવિત ફેરફાર પર આગામી 21 નવેમ્બર સુધીમાં આખરી મહોર લાગી શકે છે.

સરકારનો આ પ્રસ્તાવ એવા સમયે સામે આવ્યો છે જ્યારે વર્ષ 2022 માં ભરતી થયેલા અગ્નિવીરોના પ્રથમ બેચના 4 વર્ષનો કાર્યકાળ પૂરો થવાની તૈયારીમાં છે. ભારતીય નૌકાદળમાં અગ્નિવીરોની પહેલી બેચ 21 નવેમ્બરના રોજ પોતાનો કાર્યકાળ પૂર્ણ કરી રહી છે. ત્યારબાદ 21 ડિસેમ્બરે ભારતીય વાયુસેના ને 31 ડિસેમ્બરના રોજ થલ સેનાના પ્રથમ બેચના 4 વર્ષ પૂરા થશે.

4 ને બદલે 6 વર્ષની થઈ શકે છે સર્વિસ, દિવાળીએ જાહેરાત શક્ય

એક મુજબ, અગ્નિપથ યોજનામાં થનારા આ સંભવિત ફેરફાર અંગે નીચે મુજબની મહત્વપૂર્ણ વિગતો સામે આવી છે.

4 ને બદલે 6 વર્ષનો કાર્યકાળ: કેન્દ્ર સરકાર અગ્નિવીરોની સેવાનો સમયગાળો 4 વર્ષથી વધારીને 6 વર્ષ કરવાની તૈયારીમાં છે. જોકે, ત્રણેય સેનાઓમાંથી કુલ કેટલા અગ્નિવીરોને આ એક્સટેન્શન મળશે, તેનો ચોક્કસ આંકડો ટૂંક સમયમાં નક્કી કરવામાં આવશે.

સ્વૈચ્છિક વિકલ્પ રહેશે: નિયમ મુજબ 25% અગ્નિવીરોને કાયમી કેડરમાં પસંદ કરવામાં આવે છે. તે સિવાયના જવાનોને જે 2 વર્ષના વધારાના એક્સટેન્શનની ઓફર આપવામાં આવશે, તે સંપૂર્ણપણે અગ્નિવીરની પોતાની ઈચ્છા પર નિર્ભર રહેશે. જો તેઓ ઈચ્છે તો આગળ સેવા ચાલુ રાખી શકે છે, અથવા 4 વર્ષ પૂરા થયા બાદ ₹11.71 લાખના ટેક્સ-ફ્રી 'સેવા નિધિ' પેકેજ સાથે સેવામાંથી મુક્ત થઈ શકે છે.

સેનામાં બનશે 3 શ્રેણી: જો આ પ્રસ્તાવને મંજૂરી મળે છે, તો સશસ્ત્ર દળોમાં 3 પ્રકારના સૈનિકો હશે - પ્રથમ શરૂઆતના 4 વર્ષવાળા અગ્નિવીર, બીજા એક્સટેન્શન મેળવનારા અગ્નિવીર અને ત્રીજા રેગ્યુલર કેડરમાં સામેલ થનારા કાયમી સૈનિકો.