AI jobs layoffs: AI નથી છીનવતું નોકરીઓ, તો પછી કોણ? 45 વર્ષ જૂના ખતરાની સામે AI નથી

AI jobs layoffs: આર્ટિફિશિયલ ઇન્ટેલિજન્સ (AI) ને લઈને નોકરીઓ પર સંકટની ચર્ચા ઘણા સમયથી ચાલી રહી છે. પરંતુ શું ખરેખર AI નોકરીઓ છીનવી રહ્યું છે? યેલ યુનિવર્સિટીની તાજેતરની સ્ટડી આ વાતનો સાફ ઇનકાર કરે છે. સ્ટડી અનુસાર, AIને નોકરીઓના નુકસાનનું કારણ માનવું એ હકીકતથી વધુ કલ્પના છે.

લાખો નોકરીઓ ગઈ, પણ AI નથી જવાબદાર

layoffs.fyiની રિપોર્ટ પ્રમાણે, છેલ્લા 3 વર્ષમાં 5 લાખથી વધુ લોકોની નોકરીઓ ગઈ છે. 2025ના થોડા મહિનામાં જ 169 ટેક કંપનીઓએ 80,000થી વધુ કર્મચારીઓને નોકરીમાંથી કાઢી મૂક્યા છે. આનું નામ AI સાથે જોડવામાં આવે છે, પરંતુ યેલની સ્ટડી કહે છે કે નોકરીઓના નુકસાન પાછળ મુખ્ય કારણ આર્થિક બદલાવ છે, ખાસ કરીને 2022માં અમેરિકન ફેડરલ રિઝર્વની શૂન્ય-વ્યાજ દર નીતિ બંધ થવી.

45 વર્ષ પહેલાનો ડર અને આજનું સત્ય

સ્ટડીમાં AIની અસરને સમજવા માટે 1980ના દાયકાના ટેકનિકલ બૂમ સાથે સરખામણી કરવામાં આવી. તે સમયે પર્સનલ કોમ્પ્યુટર અને 1990ના દાયકામાં ઇન્ટરનેટના આગમનને નોકરીઓ માટે ખતરો માનવામાં આવ્યો હતો. પરંતુ ઇતિહાસ સાક્ષી છે કે આ ટેક્નોલોજીઓએ નોકરીઓ ઘટાડવાને બદલે વધારી. AIની સરખામણીમાં કોમ્પ્યુટર અને ઇન્ટરનેટે વધુ મોટા ફેરફારો કર્યા હતા, પરંતુ AI હજુ તે સ્તરે પહોંચ્યું નથી.

નોકરીઓનું સાચું કારણ શું?

સ્ટડી જણાવે છે કે નોકરીઓના નુકસાન પાછળ મોટી ટેક કંપનીઓની નીતિઓ અને આર્થિક અનિશ્ચિતતા જવાબદાર છે. કેટલીક કંપનીઓ AIની આડમાં ઊંચા પગારવાળા કર્મચારીઓને નોકરીમાંથી કાઢી રહી છે, જ્યારે અન્ય કંપનીઓ AI ટેક્નોલોજીના શરૂઆતી તબક્કાને કારણે ઉતાવળમાં છટણી કરી રહી છે. નોવેમ્બર 2022માં OpenAIના ChatGPTના લોન્ચ બાદ 33 મહિનાના અમેરિકી શ્રમ આંકડાઓનું વિશ્લેષણ કરતાં સ્ટડી દર્શાવે છે કે AIથી મોટા પાયે બેરોજગારી થઈ નથી.