ભારતનો ડંકો: 5G યૂઝર્સમાં દુનિયાનો બીજો સૌથી મોટો દેશ બન્યું ભારત, 40 કરોડ લોકો કરી રહ્યા છે ઉપયોગ

India 5G Users: ભારતે ફરી એકવાર ડિજિટલ દુનિયામાં પોતાની તાકાત બતાવી છે. ટેકનોલોજીના ક્ષેત્રમાં હરણફાળ ભરતા ભારત હવે 5G યૂઝર્સની સંખ્યામાં દુનિયાનો બીજો સૌથી મોટો દેશ બની ગયો છે. આ ખુશખબર કેન્દ્રીય સંચાર મંત્રી જ્યોતિરાદિત્ય સિંધિયાએ આપી છે. તેમણે જણાવ્યું કે ભારતમાં 5G અપનાવનારા લોકોની સંખ્યા ખૂબ જ ઝડપથી વધી રહી છે. ચાલો જાણીએ આ રિપોર્ટની મહત્વની વિગતો અને ભારતમાં ઇન્ટરનેટની બદલાતી તસવીર વિશે.

ચીન પછી ભારતનો દબદબો

કેન્દ્રીય મંત્રી જ્યોતિરાદિત્ય સિંધિયાએ સોશિયલ મીડિયા પ્લેટફોર્મ X પર પોસ્ટ કરીને આ સિદ્ધિ વિશે માહિતી આપી હતી. તેમના જણાવ્યા અનુસાર, ભારતમાં 40 કરોડથી વધુ લોકો હવે 5G સેવાનો ઉપયોગ કરી રહ્યા છે. આ આંકડા સાથે ભારત દુનિયાનો બીજો સૌથી મોટો 5G યૂઝર બેઝ બની ગયો છે. હાલમાં આ લિસ્ટમાં ભારતથી આગળ માત્ર ચીન છે. મહત્વની વાત એ છે કે ભારત માત્ર યૂઝર્સની સંખ્યામાં જ નહીં, પરંતુ 5G ટેકનોલોજીને સૌથી ઝડપથી અપનાવનારા દેશોમાં પણ સામેલ થઈ ગયું છે.

ભારતમાં 5G નેટવર્કનો વ્યાપ

ભારતમાં 5G સેવાની શરૂઆત વર્ષ 2022માં થઈ હતી. ત્યારથી લઈને અત્યાર સુધીમાં ટેલિકોમ કંપનીઓએ જબરદસ્ત કામગીરી કરી છે. આજે દેશના 99.6% જિલ્લાઓમાં 5G નેટવર્ક ઉપલબ્ધ છે. દેશની લગભગ 85% વસ્તી સુધી 5Gની પહોંચ બની ગઈ છે. ટેલિકોમ કંપનીઓએ માર્ચ 2025 સુધીમાં દેશભરમાં 4.69 લાખ 5G બેઝ ટ્રાન્સસીવર સ્ટેશન (BTS) લગાવ્યા છે.. સંચાર મંત્રાલયનું કહેવું છે કે દુનિયામાં સૌથી ઝડપી 5G નેટવર્ક રોલ-આઉટ ભારતમાં થયું છે. 5G લોન્ચ થયા બાદ લગભગ 25 કરોડ મોબાઈલ યૂઝર્સે નવી સેવાનો લાભ લેવાનું શરૂ કરી દીધું છે.

ગામડાઓમાં ઇન્ટરનેટની ક્રાંતિ

ડિજિટલ ઈન્ડિયાનો લાભ માત્ર શહેરો પૂરતો સીમિત નથી રહ્યો, પરંતુ ગામડાઓમાં પણ ટેલિકોમ કનેક્શનમાં મોટો ઉછાળો આવ્યો છે. આંકડાઓ પર નજર કરીએ તો ગ્રામીણ ટેલિફોન કનેક્શનમાં 42.9% નો વધારો થયો છે, જે શહેરી વિસ્તારો કરતા લગભગ બમણો છે. વર્ષ 2014માં ગ્રામીણ કનેક્શનની સંખ્યા 37.78 કરોડ હતી, જે સપ્ટેમ્બર 2025 સુધીમાં વધીને 53.98 કરોડ થઈ ગઈ છે.