ભારતની પહેલી ડિજિટલ જનગણના 2026: નાગરિકો પોતે ભરી શકશે માહિતી, એન્ડ્રોઇડ-આઇફોન એપ થશે લોન્ચ

ભારત સરકારે 2026-27ની જનગણનાને ડિજિટલ બનાવવાનો ઐતિહાસિક નિર્ણય લીધો છે. પ્રથમ વખત નાગરિકો વેબ પોર્ટલ અને મોબાઇલ એપ દ્વારા પોતાની માહિતી સરકાર સુધી પહોંચાડી શકશે. આ પગલું જનગણના પ્રક્રિયાને ઝડપી અને આધુનિક બનાવશે.

એન્ડ્રોઇડ અને આઇફોન માટે ખાસ એપ

સરકાર એન્ડ્રોઇડ અને આઇફોન યુઝર્સ માટે એક સરળ એપ લોન્ચ કરશે, જેના દ્વારા નાગરિકો જનગણના ડેટા સરળતાથી ભરી શકશે. આ ડેટા સુરક્ષિત વેબ પોર્ટલ પર અપલોડ થશે, જેનાથી જનગણના પ્રક્રિયા ઝડપથી પૂર્ણ થશે. અધિકારીઓના જણાવ્યા મુજબ, આ એપ જનગણનાના બંને તબક્કા—મકાન સૂચીકરણ અને આવાસ જનગણના (HLO) તેમજ જનસંખ્યા ગણના માટે ઉપયોગી રહેશે.

ડિજિટલ જનગણના, એક પરિવર્તનકારી પગલું

ભારતની આ પહેલી ડિજિટલ જનગણના હશે, જેમાં ડેટા એકત્ર કરવા અને તેને કેન્દ્રીય સર્વર પર ઇલેક્ટ્રોનિક રીતે મોકલવા માટે ડિજિટલ ટેકનોલોજીનો ઉપયોગ થશે. એક અધિકારીએ જણાવ્યું, "આ પહેલ જનગણના પ્રક્રિયાને આધુનિક બનાવવાનું મહત્વનું પગલું છે. ડિજિટલ ટેકનોલોજીથી ડેટા ઝડપથી એકત્ર થશે અને ભૂલો ઘટશે."

ડેટા સુરક્ષા માટે કડક વ્યવસ્થા

જનગણના ડેટાને ડિજિટલ રીતે એકત્ર કરવા, ટ્રાન્સફર કરવા અને સ્ટોર કરવા માટે કડક સુરક્ષા ઉપાયો અમલમાં મૂકવામાં આવશે. આ સુનિશ્ચિત કરશે કે નાગરીકોની માહિતી સુરક્ષિત રહે.