Anger and Heart attack: ગુસ્સો બની શકે છે હાર્ટ એટેકનું કારણ? જાણો નિષ્ણાતો શું કહે છે!

Anger and Heart attack: આજકાલ નાની ઉંમરે હાર્ટ એટેકના કેસ ઝડપથી વધી રહ્યા છે, જે ચિંતાનો વિષય છે. અગાઉ હાર્ટ એટેક મોટે ભાગે વૃદ્ધોમાં જોવા મળતો હતો, પરંતુ હવે યુવાનો પણ આનો શિકાર બની રહ્યા છે. તાજેતરમાં ફિટનેસ કોચે ઈન્સ્ટાગ્રામ પર એક રીલ શેર કરી, જેમાં તેમણે દાવો કર્યો કે સતત ગુસ્સો હાર્ટ એટેકનું જોખમ વધારી શકે છે. હાર્વર્ડની સ્ટડીનો હવાલો આપતા તેમણે લોકોને ગુસ્સાના જોખમો વિશે ચેતવણી આપી. તો શું ખરેખર ગુસ્સો હૃદય માટે ખતરનાક છે? ચાલો જાણીએ.

ગુસ્સો અને હાર્ટ એટેકનું કનેક્શન

હાર્વર્ડ યુનિવર્સિટીના રિસર્ચ પ્રમાણે, જ્યારે આપણે અતિશય માનસિક અથવા ઈમોશનલ સ્ટ્રેસમાં હોઈએ છીએ, ત્યારે શરીરમાં ફેરફારો થાય છે. આ ફેરફારો હૃદયને લોહી પહોંચાડતી નળીઓને અસર કરે છે, જેને ઈસ્કેમિયા કહેવાય છે. જો કોઈને પહેલાથી હૃદયની બીમારી હોય, તો આ સ્થિતિ હાર્ટ એટેકનું જોખમ બમણું કરી શકે છે.

2020ની એક સ્ટડીમાં જણાવાયું છે કે ગુસ્સો, ચિંતા કે દુઃખ જેવા ઈમોશનલ ટ્રિગર્સ હૃદય સંબંધિત સમસ્યાઓનું કારણ બની શકે છે. આ સમયે એડ્રેનાલિન અને કોર્ટિસોલ જેવા સ્ટ્રેસ હોર્મોન્સ બ્લડ પ્રેશર અને હૃદયના ધબકારા વધારે છે, જે હાર્ટ એટેકનું ટ્રિગર બની શકે છે.

2021માં JAMA જર્નલમાં પ્રકાશિત રિસર્ચમાં 918 હૃદયના દર્દીઓનો 5 વર્ષ સુધી અભ્યાસ કરવામાં આવ્યો. તેમાં જાણવા મળ્યું કે માનસિક તણાવથી ઈસ્કેમિયા થયેલા દર્દીઓમાં હાર્ટ એટેકનું જોખમ 2 ગણું હતું, જ્યારે માનસિક અને શારીરિક બંને સ્ટ્રેસવાળા દર્દીઓમાં આ જોખમ 4 ગણું હતું.

મહિલાઓ પર વધુ અસર

નિષ્ણાતોના જણાવ્યા પ્રમાણે, સ્ટ્રેસ હૃદયની નાની રક્તવાહિનીઓને અસર કરે છે, જે મહિલાઓમાં વધુ જોવા મળે છે. 2023ની એક સ્ટડીમાં 313 દર્દીઓનો અભ્યાસ કરવામાં આવ્યો, જેમાં જાણવા મળ્યું કે હાર્ટ એટેકના 48 કલાક પહેલા અતિશય ગુસ્સો અનુભવનારાઓમાં આગામી 2 કલાકમાં હાર્ટ એટેકનું જોખમ 8.5 ગણું વધ્યું હતું.