તાવ ઉતારતી આ ગોળી તમારા લીવર-કિડનીને કરે છે નુકસાન, ભારતીયો 'મીઠાઈ'ની જેમ ખાય છે: અમેરિકન ડૉક્ટરનો ચોંકાવનારો ખુલાસો

સાદી ભાષામાં કહીએ તો, ડોલો-650 બુખાર, માથાનો દુખાવો કે શરીરના દુખાવામાં તાત્કાલિક રાહત આપનારી ગોળી બની ગઈ છે. પરંતુ શું તેનો આટલો વધુ પડતો ઉપયોગ સલામત છે? અમેરિકામાં રહેતા ગેસ્ટ્રોએન્ટેરોલોજિસ્ટ ડૉ. પલાનિઅપ્પન મણિક્કમ (ડૉ. પાલ)ના તાજેતરના ટ્વીટે આ મુદ્દાને ચર્ચાનું કેન્દ્ર બનાવ્યો છે. તેમણે ટ્વીટ કર્યું, “ભારતીયો ડોલો-650ને એવી રીતે લે છે જાણે તે કેડબરી જેમ્સ હોય.” આ વાત હળવી લાગે, પરંતુ તેની પાછળની હકીકત ચોંકાવનારી છે. ડોલો-650નો અંધાધૂંધ ઉપયોગ હવે ડૉક્ટરો માટે ચિંતાનો વિષય બન્યો છે.

ડોલો-650 શું છે?

ડોલો-650માં 650 મિલિગ્રામ પેરાસિટામોલ હોય છે, જે સામાન્ય 500 મિલિગ્રામની ડોઝ કરતાં વધુ છે. આ દવા માઇક્રો લેબ્સ લિમિટેડ દ્વારા બનાવવામાં આવે છે. કોરોના મહામારી દરમિયાન તેની માંગમાં અચાનક ઉછાળો આવ્યો હતો. વેક્સીનની આડઅસરો કે હળવા બુખારમાં તેનો ખૂબ ઉપયોગ થયો. એક રિપોર્ટ મુજબ, મહામારીની બીજી લહેરમાં ડોલો-650નું વેચાણ રેકોર્ડ સ્તરે પહોંચ્યું હતું. સોશિયલ મીડિયા પર તો તેને ‘ભારતનું ફેવરિટ સ્નેક’ પણ કહેવામાં આવ્યું હતું.

ડોલો-650 ખાવામાં શું ખતરો છે?