યોગથી કાબુમાં કરી શકાય છે સંધિવાની બિમારી, AIIMSની નવી સ્ટડીમાં ખુલાસો

સંધિવા એ એક રોગ છે જે પહેલા ફક્ત વૃદ્ધ લોકોમાં જ થતો હતો, પરંતુ છેલ્લા કેટલાક વર્ષોમાં, યુવાનોમાં પણ સંધિવાના કિસ્સાઓ વધી રહ્યા છે. સામાન્ય સંધિવા કરતાં રુમેટોઈડ સંધિવા વધુ ખતરનાક માનવામાં આવે છે. તાજેતરમાં, AIIMS, દિલ્હીમાં હાથ ધરવામાં આવેલા એક અભ્યાસમાં જાણવા મળ્યું છે કે સંધિવાને યોગ દ્વારા નોંધપાત્ર રીતે કંટ્રોલ કરી શકાય છે.

યોગ અને પ્રાણાયામ સંધિવાને નિયંત્રિત કરવામાં અસરકારક સાબિત થાય છે. નવી દિલ્હીની ઓલ ઈન્ડિયા ઈન્સ્ટીટ્યુટ ઓફ મેડિકલ સાયન્સ (AIIMS)એ આ અંગે સંશોધન કર્યું છે, જેમાં જાણવા મળ્યું છે કે પ્રાણાયામ અને યોગ કરવાથી સંધિવાનું જોખમ નોંધપાત્ર રીતે ઘટાડી શકાય છે. નિયમિત રીતે યોગ કરવાથી શરીરમાં બળતરા ઓછી થાય છે અને શરીરમાં ઓક્સિડેટીવ તણાવ પણ ઓછો થાય છે. જીન્સમાં થતા ફેરફારોને પણ યોગ દ્વારા સુધારી શકાય છે. યોગ કરવાથી શરીરમાં ઇમ્યુનોલોજિકલ સહિષ્ણુતાની ક્ષમતા વધે છે, જેના કારણે સંધિવા જેવા રોગોને નિયંત્રિત કરી શકાય છે.

યોગથી સંધિવાનું જોખમ ઘટશે

AIIMS, નવી દિલ્હીમાં એનાટોમી વિભાગના પ્રોફેસર ડૉ. રીમા દાદા કહે છે કે રુમેટોઈડ આર્થરાઈટિસની બીમારીમાં સાંધામાં ખૂબ દુખાવો થાય છે. રુમેટોઇડ સંધિવા હૃદય, ફેફસાં અને ત્વચાને પણ અસર કરી શકે છે. જો સમયસર સારવાર ન કરવામાં આવે તો આ રોગ આખા શરીરમાં ફેલાઈ શકે છે. આવી સ્થિતિમાં, દર્દીની સ્થિતિ વધુ ખરાબ થઈ શકે છે. સંધિવાથી પગ અને શરીરના અન્ય ભાગોમાં સોજો આવે છે. તણાવને કારણે આ સમસ્યા વધુ વધે છે. જો કે, તેને યોગ દ્વારા નિયંત્રિત કરી શકાય છે. ડૉક્ટરનું કહેવું છે કે એઈમ્સ નવી દિલ્હીમાં કરવામાં આવેલા સંશોધનમાં જાણવા મળ્યું છે કે યોગ અને પ્રાણાયામની નિયમિત પ્રેક્ટિસ દ્વારા આર્થરાઈટિસનું જોખમ ઘટાડી શકાય છે.

રુમેટોઇડ સંધિવા શું છે?

સામાન્ય સંધિવા કરતાં રુમેટોઇડ સંધિવા વધુ ખતરનાક માનવામાં આવે છે. આ રોગમાં, શરીરની રોગપ્રતિકારક શક્તિ તેના તંદુરસ્ત પેશીઓ અને કોષો પર હુમલો કરવાનું શરૂ કરે છે. રુમેટોઇડ સંધિવા કોઈપણ ઉંમરના લોકોને થઈ શકે છે. શરીરના કોઈપણ ભાગમાં જડતા અને સાંધામાં દુખાવો એ સંધિવાના પ્રારંભિક લક્ષણો હોઈ શકે છે. જો તમે આ લક્ષણોને ઓળખો અને નિયંત્રિત કરો, તો તેને આખા શરીરમાં ફેલાતા અટકાવી શકાય છે.

આ પણ વાંચો - ક્રેડિટ કાર્ડથી કરવામાં આવેલી ખરીદી પર મળી શકે છે આવકવેરાની નોટિસ, જાણો શું કહે છે નિયમો