નેટફ્લિક્સે લોન્ચ કર્યું નવું ફીચર, હવે ટીવી પર પણ 30+ ભાષાઓમાં જોઈ શકાશે મૂવી અને વેબ સિરીઝ

નેટફ્લિક્સે તેના યુઝર્સના અનુભવને વધુ સારો બનાવવા માટે એક મોટું પગલું ભર્યું છે. કંપનીએ ભાષા પસંદગીના વિકલ્પમાં ફેરફાર કર્યો છે, જેના કારણે હવે દુનિયાભરનું કન્ટેન્ટ 30થી વધુ ભાષાઓમાં ઉપલબ્ધ થશે. આ નવું ફીચર ખાસ કરીને બહુભાષી દર્શકો અને નવી ભાષા શીખવા માંગતા લોકો માટે ખૂબ જ ઉપયોગી સાબિત થશે.

ગ્લોબલ કન્ટેન્ટની પહોંચ વધશે

નેટફ્લિક્સના આ નિર્ણય પાછળ ગૈર-અંગ્રેજી કન્ટેન્ટની વધતી લોકપ્રિયતા મુખ્ય કારણ છે. કંપનીના જણાવ્યા અનુસાર, તેમના મોટા ભાગના વ્યૂઝ ગૈર-અંગ્રેજી ભાષાઓમાંથી આવે છે. આને ધ્યાનમાં રાખીને, નેટફ્લિક્સે પોતાના પ્લેટફોર્મ પર વધુ ભાષાઓમાં કન્ટેન્ટ ઉપલબ્ધ કરાવવાનું નક્કી કર્યું છે. આનાથી યુઝર્સને વૈશ્વિક સ્તરનું કન્ટેન્ટ તેમની પસંદગીની ભાષામાં જોવાની તક મળશે.

30+ ભાષાઓમાં ઉપલબ્ધ થશે કન્ટેન્ટ

નેટફ્લિક્સનું કેટલોગ હવે 30થી વધુ ભાષાઓમાં ઉપલબ્ધ છે, જેમાં ઘણી લોકપ્રિય ફિલ્મો અને સિરીઝનો સમાવેશ થાય છે. ઉદાહરણ તરીકે, ‘સ્ક્વિડ ગેમ’ (કોરિયન), ‘બર્લિન’ (સ્પેનિશ), ‘લુપિન’ (ફ્રેન્ચ), ‘હૂ કિલ્ડ સારા?’ (મેક્સિકન), ‘ટ્રોલ’ (નોર્વેજિયન) અને ‘ઓલ ક્વાયટ ઓન ધ વેસ્ટર્ન ફ્રન્ટ’ (જર્મન) જેવા શો અને ફિલ્મો દર્શાવે છે કે ભાષાની વિવિધતા કન્ટેન્ટની પહોંચને કેટલી વધારી શકે છે.

ટીવી પર પણ ભાષા પસંદગીનો વિકલ્પ

અગાઉ આ સુવિધા ફક્ત મોબાઈલ ડિવાઈસ અને વેબ બ્રાઉઝર પર જ ઉપલબ્ધ હતી, પરંતુ હવે નેટફ્લિક્સે ટીવી યુઝર્સ માટે પણ આ સુવિધા શરૂ કરી છે. કંપનીનું કહેવું છે કે દર મહિને હજારો યુઝર્સ તરફથી વિવિધ ભાષાઓમાં કન્ટેન્ટ ઉપલબ્ધ કરાવવાની માંગણીઓ આવતી હતી, જેને ધ્યાનમાં રાખીને આ અપડેટ લાવવામાં આવ્યું છે.