Time magazine: ‘ટાઈમ' મેગેઝિનમાં 100 સૌથી પ્રભાવશાળી વ્યક્તિઓમાં સાક્ષી મલિક, આલિયા ભટ્ટનું નામ, જાણો કેટલા વધુ ભારતીયોને મળ્યું સ્થાન

Time magazine: ટાઈમ મેગેઝીને 100 સૌથી પ્રભાવશાળી લોકોની યાદી બહાર પાડી છે. આ યાદીમાં ભારતીય રેસલર સાક્ષી મલિક અને અભિનેત્રી આલિયા ભટ્ટનું નામ પણ સામેલ છે.કુશ્તીમાં ભારતની એકમાત્ર મહિલા ઓલિમ્પિક મેડલ વિજેતા સાક્ષીને ભારતીય રેસલિંગ ફેડરેશન (WFI)ના ભૂતપૂર્વ પ્રમુખ બ્રિજ ભૂષણ શરણ સિંહ દ્વારા મહિલા કુસ્તીબાજોની કથિત જાતીય સતામણી સામેની લડાઈ માટે યાદીમાં સામેલ કરવામાં આવી છે. અભિનેત્રી આલિયા ભટ્ટને અભિનય ક્ષેત્રે તેમજ લોક કલ્યાણના કાર્યોમાં યોગદાન માટે આ યાદીમાં સ્થાન મળ્યું છે.

ભારતીય મૂળના આ વ્યક્તિત્વોને પણ સ્થાન મળ્યું

આ યાદીમાં ભારતીય મૂળના હોલીવુડ અભિનેતા દેવ પટેલનું નામ પણ સામેલ છે. દેવ પટેલ ઈન્ડો-બ્રિટિશ મૂળના અભિનેતા છે. માઈક્રોસોફ્ટના સીઈઓ સત્ય નડેલા પણ ભારતીય મૂળના વ્યક્તિ છે અને તેમને પણ ટાઈમ મેગેઝીનની આ યાદીમાં સ્થાન મળ્યું છે. યુએસ ડિપાર્ટમેન્ટની લોન પ્રોગ્રામ ઓફિસના ડાયરેક્ટર જીગર શાહનું નામ પણ આ યાદીમાં છે. શાહનો જન્મ ગુજરાતના મોડાસામાં થયો હતો.

ટાઈમ મેગેઝીનની 100 સૌથી પ્રભાવશાળી વ્યક્તિઓની યાદીમાં બિઝનેસમેન અજય બંગાએ પણ સ્થાન મેળવ્યું છે. અજય બંગા વિશ્વ બેન્કના પ્રમુખ છે અને તેમનો જન્મ મહારાષ્ટ્રના પુણેમાં થયો હતો. આ લિસ્ટમાં ફેમસ શેફ અસમા ખાનને પણ સ્થાન મળ્યું છે. કોલકાતામાં જન્મેલી અસ્મા ખાન એક પ્રખ્યાત શેફ છે અને લંડનની પ્રખ્યાત રેસ્ટોરન્ટ દાર્જિલિંગ એક્સપ્રેસની માલિક પણ છે.