શું બ્રિટનના ભાગલા પડશે? વેલ્સ, સ્કોટલેન્ડ અને ઉત્તરી આયર્લેન્ડે અલગ થવા માટે ઐતિહાસિક કરાર પર કર્યા હસ્તાક્ષર

એક સમય હતો જ્યારે દુનિયાના મોટા ભાગ પર બ્રિટનનું રાજ ચાલતું હતું. બ્રિટિશ સરકારે અનેક દેશો પર કબજો કર્યો, ત્યાં શાસન ચલાવ્યું અને તેમના ભાગલા પણ પાડ્યા. પરંતુ આજે પરિસ્થિતિ બદલાઈ ગઈ છે. હવે એ જ બ્રિટનને પોતાના દેશના ભાગલા પડવાનો ડર સતાવી રહ્યો છે. એવી પ્રબળ સંભાવનાઓ દેખાઈ રહી છે કે વેલ્સ, સ્કોટલેન્ડ અને ઉત્તરી આયર્લેન્ડ આગામી સમયમાં બ્રિટનથી અલગ થઈ શકે છે.

સોમવારે આ ત્રણેય ક્ષેત્રોના ટોચના નેતાઓએ એક એવા કરાર પર હસ્તાક્ષર કર્યા છે, જેનાથી બ્રિટન તૂટવાનો ખતરો વધી ગયો છે.

શું છે સમગ્ર મામલો?

વેલ્સના કાર્ડિફ શહેરમાં મળેલી બેઠક દરમિયાન વેલ્સ, સ્કોટલેન્ડ અને ઉત્તરી આયર્લેન્ડના નેતાઓએ આ કરારની જાહેરાત કરી હતી. આ દેશોએ બ્રિટન પાસેથી વધુ સ્વાયત્તતા અને સંપૂર્ણ આઝાદી માટે 'જનમત સંગ્રહ'કરાવવાના અધિકારની માંગ કરી છે.

આ નેતાઓએ બ્રિટનના વડાપ્રધાન એન્ડી બર્નહામ અને તેમની સરકારને કડક શબ્દોમાં સંદેશો આપ્યો છે કે, તેઓ બંધારણીય ફેરફારો માટે તૈયાર રહે, કારણ કે આ વિસ્તારોનું ભવિષ્ય યુરોપિયન યુનિયન સાથે સુરક્ષિત છે. આ કરારમાં બ્રિટિશ સંસદ તરફ ઈશારો કરતા સ્પષ્ટપણે કહેવાયું છે કે, "આ ટાપુઓ અને દુનિયાભરમાં આ બધું જોઈ રહેલા લોકો માટે આનાથી મોટો કોઈ સંકેત ન હોઈ શકે કે હવે બ્રિટિશ સંસદનો સમય પૂરો થઈ રહ્યો છે."

બ્રિટનના વડાપ્રધાનનું શું કહેવું છે?

આ વધતા દબાણ વચ્ચે બ્રિટનના વડાપ્રધાન એન્ડી બર્નહામે તાજેતરમાં સાંસદોને જણાવ્યું હતું કે, જો તમામ પક્ષો વચ્ચે સહમતિ સધાશે, તો તેઓ સ્કોટલેન્ડની આઝાદી માટે વધુ એક જનમત સંગ્રહને મંજૂરી આપવા તૈયાર છે.