India Airport High Alert: ભારતના તમામ એરપોર્ટ હાઈ એલર્ટ પર, આતંકવાદી હુમલાની ચેતવણી

India Airport High Alert: ભારતના તમામ એરપોર્ટને હાઈ એલર્ટ પર મૂકવામાં આવ્યા છે. કેન્દ્રીય ગુપ્તચર એજન્સીઓએ 22 સપ્ટેમ્બરથી 2 ઓક્ટોબર 2025 દરમિયાન આતંકવાદી હુમલાની આશંકા વ્યક્ત કરી છે. આને ધ્યાનમાં રાખીને નાગરિક ઉડ્ડયન મંત્રાલય હેઠળ કામ કરતી બ્યુરો ઓફ સિવિલ એવિએશન સિક્યુરિટી (BCAS) એ 4 ઓગસ્ટે એક નોટિફિકેશન જાહેર કરી છે.

સુરક્ષા વ્યવસ્થામાં વધારો

BCASની નોટિફિકેશનમાં તમામ એરપોર્ટ, એરસ્ટ્રિપ, હેલિપેડ, ફ્લાઈંગ સ્કૂલ અને ટ્રેનિંગ સેન્ટર્સમાં સુરક્ષા વધારવાના આદેશ આપવામાં આવ્યા છે. આતંકવાદીઓ કે અસામાજિક તત્વો કોઈપણ પ્રકારની ઘટનાને અંજામ આપવાનો પ્રયાસ કરી શકે છે. આથી, એરપોર્ટ ટર્મિનલ, પાર્કિંગ, આસપાસના વિસ્તારો અને અન્ય મહત્વના સ્થળોએ સતત પેટ્રોલિંગ અને નિરીક્ષણ કરવામાં આવશે. તમામ CCTV કેમેરા 24 કલાક એક્ટિવ રહેશે, અને કોઈપણ સંદિગ્ધ વસ્તુ કે પ્રવૃત્તિની તાત્કાલિક તપાસ કરવામાં આવશે.

એરપોર્ટની બહાર પણ કડક સુરક્ષા

એરપોર્ટની બહારના વિસ્તારોમાં સ્થાનિક પોલીસની મદદથી સુરક્ષા વ્યવસ્થા મજબૂત કરવામાં આવી રહી છે. તમામ કર્મચારીઓ, કોન્ટ્રાક્ટરો અને વિઝિટર્સની ઓળખની કડક તપાસ કરવામાં આવશે. ઘરેલું અને આંતરરાષ્ટ્રીય કાર્ગો તેમજ મેલની વિશેષ તપાસ પછી જ ક્લિયર કરવામાં આવશે.

મુસાફરો માટે સૂચના

મુસાફરોને અપીલ કરવામાં આવી છે કે, જો તેઓને કોઈ સંદિગ્ધ વ્યક્તિ કે વસ્તુ જોવા મળે, તો તાત્કાલિક સિક્યુરિટી સ્ટાફને જાણ કરે. આ સાથે, સમયાંતરે એનાઉન્સમેન્ટ અને સિક્યુરિટી ડ્રિલ્સ પણ યોજવામાં આવશે, જેથી કોઈપણ આપાત્તિની સ્થિતિમાં ત્વરિત પગલાં લઈ શકાય.