Tata Motors price hike: 1 ઓક્ટોબરથી Tata Motorsની ગાડીઓ થશે મોંઘી, જાણો કેટલો વધશે ભાવ

Tata Motors price hike: જો તમે ટાટા મોટર્સની નવી કોમર્શિયલ ગાડી ખરીદવાનું વિચારી રહ્યા છો, તો તમારે હવે ખિસ્સું વધારે ખાલી કરવું પડશે. દેશની જાણીતી ઓટોમોબાઈલ કંપની ટાટા મોટર્સે 1 ઓક્ટોબર 2026 થી પોતાના તમામ કોમર્શિયલ વાહનોની કિંમતમાં 1 ટકા સુધીનો વધારો કરવાની સત્તાવાર જાહેરાત કરી છે.

કયા મોડલ પર કેટલો વધશે ભાવ?

કંપનીએ સ્ટોક એક્સચેન્જને આપેલી માહિતી મુજબ, 1 ઓક્ટોબર 2026 થી કિંમતો વધવા જઈ રહી છે, પરંતુ આ ભાવ વધારો તમામ મોડલ પર એકસરખો નહીં હોય. કઈ ગાડી પર કેટલા રૂપિયા વધશે, તે તેના મોડલ અને વેરિએન્ટ પર નિર્ભર રહેશે. આનો સીધો અર્થ એ છે કે, ઓક્ટોબર મહિનાથી ટાટાના ટ્રક, બસ કે અન્ય કોમર્શિયલ વાહનો ખરીદવા માટે ગ્રાહકોએ વધુ કિંમત ચૂકવવી પડશે.

શા માટે વધી રહી છે કિંમતો?

કંપનીના જણાવ્યા અનુસાર, વાહન બનાવવા માટે વપરાતા કાચા માલ અને અન્ય ઇનપુટ કોસ્ટમાં સતત વધારો થઈ રહ્યો છે. આ ઉપરાંત લોજિસ્ટિક્સ અને સપ્લાય ચેઈન સાથે જોડાયેલો ખર્ચ પણ વધી રહ્યો છે. ઓટો કંપનીઓ પર પડતા આ વધારાના આર્થિક બોજને સરભર કરવા માટે કંપનીએ કિંમતો વધારવાનો આ નિર્ણય લીધો છે.

આ વર્ષે કોમર્શિયલ ગાડીઓમાં બીજો મોટો વધારો

તમને જણાવી દઈએ કે, ટાટા મોટર્સના કોમર્શિયલ વાહનોમાં આ વર્ષે આ બીજો મોટો ભાવ વધારો છે. અગાઉ 1 એપ્રિલ 2026 ના રોજ પણ કંપનીએ ગાડીઓની કિંમતમાં 1.5 ટકા સુધીનો વધારો કર્યો હતો. ત્યારે પણ કંપનીએ કાચા માલની વધતી કિંમતોનું જ કારણ આપ્યું હતું. માત્ર એક જ વર્ષની અંદર બે વાર ભાવ વધતા કોમર્શિયલ વાહનો ખરીદનારા ગ્રાહકોને સીધી અસર પડશે.