સ્ટીલ-એલ્યુમિનિયમ બાદ 'ઓટો ટેરિફ' લાદવાની તૈયારી કરી રહ્યા છે ટ્રમ્પ, ઓટો ઉદ્યોગની મુશ્કેલીઓ વધશે

યુએસ પ્રમુખ ડોનાલ્ડ ટ્રમ્પ એપ્રિલની શરૂઆતમાં ઇમ્પોર્ટ કાર પર ટેરિફની જાહેરાત કરશે, જે દક્ષિણ કોરિયાના ઓટોમોટિવ ઉદ્યોગ માટે મોટો ફટકો હોઈ શકે છે. યુએસ રાષ્ટ્રપતિ 2 એપ્રિલના રોજ ઓટો ટેરિફની જાહેરાત કરવા જઈ રહ્યા છે. ટ્રમ્પ યુ.એસ. વેપાર ખાધ ઘટાડવા, લોકલ પ્રોડક્શનને વેગ આપવા અને અનઓથોરાઇઝ્ડ ઇમિગ્રન્ટ્સ અને દવાઓના પ્રવાહને રોકવા સહિતના અન્ય નીતિગત લક્ષ્યોને પ્રાપ્ત કરવા માટે ટેરિફનો મુખ્ય સાધન તરીકે ઉપયોગ કરી રહ્યા છે.

ટ્રમ્પની ટેરિફ-આધારિત પોલીસી વચ્ચે, એશિયાની ચોથી સૌથી મોટી અર્થવ્યવસ્થા તેમના વહીવટનું લક્ષ્ય બની શકે છે તેવી આશંકા વધી રહી છે. એક એજન્સીના અહેવાલ મુજબ, આનું કારણ એ છે કે ગયા વર્ષે દક્ષિણ કોરિયાનો યુનાઇટેડ સ્ટેટ્સ સાથેનો વેપાર સરપ્લસ $55.7 બિલિયન સુધી પહોંચી ગયો હતો.

અમેરિકી રાષ્ટ્રપતિએ એ વાતની સ્પષ્ટતા કરી ન હતી કે તેઓ 2 એપ્રિલે જ ટેરિફની જાહેરાત કરશે કે તે તે જ દિવસે અમલમાં આવશે. દક્ષિણ કોરિયા માટે અમેરિકા એક ટોચનું ઓટો એક્સપોર્ટ બજાર છે. ગયા વર્ષે દક્ષિણ કોરિયાની કુલ કાર નિકાસમાંથી, યુએસમાં નિકાસ $34.7 બિલિયન અથવા 49.1 ટકા હતી.

દ્વિપક્ષીય મુક્ત વેપાર કરાર હેઠળ 2016થી કોરિયન કારો પર કોઈ યુએસ ટેરિફ નથી. ઓટો ટેરિફની જાહેરાત એવા સમયે કરવામાં આવી રહી છે જ્યારે ટ્રમ્પ વહીવટીતંત્ર યુએસ આયાત પર 'પારસ્પરિક' ટેરિફ લાદવા માટે દબાણ કરી રહ્યું છે જે અન્ય દેશો દ્વારા અમેરિકન માલ પર લાદવામાં આવેલા ટેરિફ સાથે મેળ ખાય.