કેન્દ્ર સરકારની મોટી ભેટ: સામાજિક સહાય યોજના માટે 53428 કરોડ મંજૂર, હવે 40 ટકા વિકલાંગતા પર પણ મળશે પેન્શન

Cabinet decision: વડાપ્રધાન નરેન્દ્ર મોદીની અધ્યક્ષતામાં મળેલી કેન્દ્રીય કેબિનેટની બેઠકમાં દેશના ગરીબ, વૃદ્ધ, વિધવા અને દિવ્યાંગ નાગરિકો માટે એક બહુ મોટો નિર્ણય લેવામાં આવ્યો છે. સરકારે રાષ્ટ્રીય સામાજિક સહાય કાર્યક્રમને આગામી પાંચ વર્ષ એટલે કે 2026-27 થી લઈને 2030-31 સુધી ચાલુ રાખવાની સત્તાવાર મંજૂરી આપી દીધી છે. આ માટે 53428 કરોડ રૂપિયાનું જંગી બજેટ ફાળવવામાં આવ્યું છે.

આ સાથે જ સરકારે પેન્શન યોજનાઓના નિયમોમાં મોટા ફેરફાર કર્યા છે અને યોજનાઓના જૂના નામ બદલીને નવા નામ રાખ્યા છે. કેન્દ્રીય મંત્રી અશ્વિની વૈષ્ણવે આ નિર્ણયની માહિતી આપતા જણાવ્યું હતું કે આ દુનિયાનું સૌથી મોટું સોશિયલ સિક્યોરિટી નેટ છે, જેને હવે 2031 સુધી લંબાવી દેવામાં આવ્યું છે.

દિવ્યાંગ પેન્શનના નિયમોમાં મોટો ફેરફાર

આ નવા નિર્ણયમાં સૌથી મોટી રાહત દિવ્યાંગોને આપવામાં આવી છે. જાણો શું થયા છે ફેરફાર

પાત્રતા મર્યાદા ઘટી: પહેલા દિવ્યાંગ પેન્શન મેળવવા માટે 80 ટકા વિકલાંગતા હોવી જરૂરી હતી. પરંતુ હવે આ મર્યાદા અડધી કરીને માત્ર 40 ટકા કરી દેવામાં આવી છે. એટલે કે 40 ટકા વિકલાંગતા ધરાવતા લોકો પણ હવે પેન્શન માટે હકદાર બનશે.

ઉંમરનો બાધ દૂર: પેન્શન મેળવવા માટેની ન્યૂનતમ ઉંમરની શરત હટાવી લેવામાં આવી છે. આનો અર્થ એ કે જન્મથી જ વિકલાંગ બાળકો પણ આ સહાય માટે પાત્ર ગણાશે.

સહાયની રકમ: 0 થી 79 વર્ષની ઉંમરના લાભાર્થીઓને દર મહિને 375 રૂપિયા મળશે, જ્યારે 80 વર્ષ કે તેથી વધુ ઉંમરના લોકોને દર મહિને 625 રૂપિયાની આર્થિક મદદ અપાશે.