Cyclone Mocha Updates: ‘મોકા' રાત્રે વિકરાળ સ્વરૂપ ધારણ કરશે, 9 કિમી પ્રતિ કલાકની ઝડપે વધી રહ્યું છે આગળ

Cyclone Mocha Updates: બંગાળની ખાડીમાં સર્જાયેલું વાવાઝોડું ‘મોકા' હવે ખતરનાક સ્વરૂપ ધારણ કરી રહ્યું છે. ચક્રવાત ‘મોકા' ઝડપથી આગળ વધી રહ્યું છે. આજે એટલે કે શુક્રવારની રાત્રે તે ગંભીર ચક્રવાતી તોફાનમાં ફેરવાઈ શકે છે. આ પછી 135 કિલોમીટર પ્રતિ કલાકની ઝડપે પવન પણ ફૂંકાઈ શકે છે. તે બાંગ્લાદેશ અને મ્યાનમારના તટ તરફ આગળ વધવાની ધારણા છે. ઈન્ડિયા મેટ્રોલોજીકલ ડિપાર્ટમેન્ટ (IMD)ના વરિષ્ઠ વૈજ્ઞાનિક ઉમાશંકર દાસે જણાવ્યું હતું કે ચક્રવાતી વાવાઝોડું ‘મોકા' મધ્ય બંગાળની ખાડી પ્રદેશને અડીને આવેલા દક્ષિણપૂર્વ બંગાળની ખાડીમાં ખૂબ જ તીવ્ર ચક્રવાતી વાવાઝોડામાં ફેરવાઈ ગયું છે. હવે તે 9 કિમી પ્રતિ કલાકની ઝડપે ઉત્તર દિશામાં આગળ વધી રહ્યું છે.

દરમિયાન, હવામાન વિભાગ દ્વારા શુક્રવારે સવારે એક નિવેદન જારી કરવામાં આવ્યું હતું જેમાં કહેવામાં આવ્યું હતું કે ચક્રવાતી તોફાન ‘મોકા' તીવ્ર બન્યું છે. તે આજે સવારે 5:30 વાગ્યે પોર્ટ બ્લેરથી લગભગ 520 કિમી પશ્ચિમ-ઉત્તર પશ્ચિમમાં 13.2N અને 88.1E નજીક દક્ષિણપૂર્વ બંગાળની ખાડી પર કેન્દ્રિત છે.

ચક્રવાત મોકા શુક્રવારે વધુ તીવ્ર બનશે, હવામાન કચેરીએ જણાવ્યું હતું. તે રવિવારના રોજ મ્યાનમારના બંદર શહેર સિત્તવે નજીક કોક્સ બજાર અને ક્યાયુકપ્યુ વચ્ચેના બીચ પર ટકરાશે. જેના કારણે 175 કિલોમીટર પ્રતિ કલાકની ઝડપે પવન ફૂંકાય તેવી શક્યતા છે.

IMD ઓફિસે માછીમારો, જહાજો, બોટ અને ટ્રોલર્સને રવિવાર સુધી મધ્ય અને ઉત્તરપૂર્વ બંગાળની ખાડી અને ઉત્તર આંદામાન સમુદ્રમાં ન જવાની સલાહ આપી છે. મધ્ય બંગાળની ખાડી અને ઉત્તર આંદામાન સમુદ્રમાં જતા લોકોને દરિયાકિનારે પાછા ફરવાની સલાહ આપવામાં આવી છે.