નાણામંત્રી નિર્મલા સીતારમણે ફિનટેક કંપનીઓને કરી હાકલ.. ડિજિટલ ફ્રોડ રોકવા માટે લો પગલાં

કેન્દ્રીય નાણામંત્રી નિર્મલા સીતારમણે ફિનટેક (ફાઇનાન્સિયલ ટેકનોલોજી) કંપનીઓને ડિજિટલ અરેસ્ટ અને સાયબર ફ્રોડ જેવી ઘટનાઓને રોકવા અથવા તેનો સામનો કરવા માટે સોલ્યુશન્સ શોધવા જણાવ્યું છે. તેમણે ખાસ ભાર મૂક્યો હતો કે સ્ટાર્ટઅપ કંપનીઓ એવા સોલ્યુશન્સ લઈને આવે જેથી લોકોને ઘરે બેઠા ડિજિટલી 'અરેસ્ટ' ન કરી શકાય અથવા ઓપરેટરો રાતોરાત તેમના પૈસા પડાવી ન શકે.

ડીપફેક ટેક્નોલોજી પણ મોટો ખતરો

સીતારમણે ચેતવણી આપી હતી કે ડીપફેક ટેક્નોલોજી પણ એક મોટો ખતરો છે, જે મોટા પાયે જનતાને ઘણું નુકસાન પહોંચાડી રહી છે. તેમણે કહ્યું કે આજે આપણે આનો સામનો કરવામાં સાવચેતી રાખવી પડશે. આથી, તેમણે એવી ફિનટેક કંપનીઓના એક ગ્રુપની જરૂરિયાત પર ભાર મૂક્યો જે સતત નવી ચેલેન્જીસ માટે સોલ્યુશન્સ આપવા માટે કામ કરી રહી છે.

ફાઇનાન્સિયલ ઇન્ક્લુઝન અને પેમેન્ટ સિસ્ટમમાં ફિનટેકનો ફાળો

નાણામંત્રીએ ફાઇનાન્સિયલ ઇન્ક્લુઝનમાં ઝડપ લાવવા અને પેમેન્ટ સિસ્ટમને દેશના અંતરિયાળ વિસ્તારો સુધી લઈ જવામાં મદદ કરવા માટે ફિનટેક સેક્ટરને શ્રેય આપ્યો. તેમણે ફિનટેક સેક્ટરને મુખ્ય MSME (માઈક્રો, સ્મોલ અને મીડિયમ એન્ટરપ્રાઈઝિસ) ક્ષેત્રમાં ડિજિટલ લોન સુવિધાઓનો વધુ વિસ્તાર કરવા પણ આહ્વાન કર્યું.

ભારતીય ફિનટેક ઇનોવેશનમાં ગ્લોબલ પોટેન્શિયલ

સીતારમણે જણાવ્યું કે ભારતીય ફિનટેક ઇનોવેશનમાં ગ્લોબલ પબ્લિક ગુડ બનવાની ક્ષમતા છે, જેનાથી બીજી ઉભરતી અને વિકસિત અર્થવ્યવસ્થાઓને લાભ મળી શકે છે. આનાથી ભારતીય ફર્મ્સ માટે નવા માર્કેટ્સ ખુલશે. તેમણે ઉદાહરણ આપ્યું કે UPI (યુનિફાઇડ પેમેન્ટ્સ ઇન્ટરફેસ) દ્વારા ઇન્ટરનેશનલ વેપારી પેમેન્ટ્સ હવે સાત દેશો - ભૂટાન, ફ્રાન્સ, મોરેશિયસ, નેપાળ, સિંગાપોર, શ્રીલંકા અને UAE માં પસંદગીના વેપારી આઉટલેટ્સ પર સ્વીકારવામાં આવે છે. તેમણે કહ્યું કે આપણા પ્લેયર્સે પોતાના સફળ મોડલ્સને વિદેશમાં એક્સપોર્ટ કરવા અને ગ્લોબલ માર્કેટ્સ પર કબજો કરવાનું લક્ષ્ય રાખવું જોઈએ.