US vs China Gold Market: છેલ્લા થોડા સમયથી સોનાના ભાવમાં (Gold Price) જે જબરદસ્ત ઉતાર-ચઢાવ જોવા મળી રહ્યો છે, તેના તાર હવે ચીન સાથે જોડાઈ રહ્યા છે. અમેરિકાએ સોનાના બજારમાં મચેલી અફરાતફરી માટે સીધો ચીનને જવાબદાર ગણાવ્યું છે. અમેરિકાનું કહેવું છે કે ચીની વેપારીઓને કારણે સોનાના માર્કેટની ચાલ બગડી છે.
Gold Price: સોનાના ભાવમાં ભડકો કેમ થયો? અમેરિકાએ ચીન પર ફોડ્યો દોષનો ટોપલો, જાણો શું છે આખો મામ
US vs China Gold Market: સોનાના ભાવમાં થયેલી ભારે ઉથલપાથલ માટે અમેરિકાએ ચીનને જવાબદાર ગણાવ્યું છે. જાણો અમેરિકન નાણામંત્રી સ્કોટ બેસેન્ટે ચીન વિશે શું મોટો ખુલાસો કર્યો અને સોનાની તેજીનું સાચું કારણ શું છે.
MoneyControl Newsઅપડેટેડ Feb 12, 2026 પર 6:23 PM
અમેરિકાએ ચીન પર શું આરોપ લગાવ્યો?
અમેરિકાના નાણામંત્રી (Finance Minister) સ્કોટ બેસેન્ટે એક ચોંકાવનારું નિવેદન આપ્યું છે. તેમણે કહ્યું કે હાલમાં સોનામાં જે તેજી દેખાઈ રહી છે તે એક ‘સ્પેક્યુલેટિવ બ્લોઓફ’ (Speculative Blowoff) એટલે કે તર્ક વગરની સટ્ટાખોરી જેવી છે. બેસેન્ટે દાવો કર્યો છે કે ચીનમાં પરિસ્થિતિ થોડી ‘બેલગામ’ થઈ ગઈ છે. ત્યાં ટ્રેડિંગ માટેના માર્જિનના નિયમો કડક કરવામાં આવી રહ્યા છે, જેના કારણે બજારમાં ગભરાટ અને અફરાતફરીનો માહોલ બન્યો છે.
સરળ ભાષામાં કહીએ તો, ચીનમાં લોકો સોનામાં આડેધડ સટ્ટો રમી રહ્યા હતા, જેના પર લગામ કસવા માટે હવે ત્યાંની સરકાર નિયમો કડક કરી રહી છે, અને તેની સીધી અસર વૈશ્વિક બજાર પર પડી છે.
સોનામાં તેજીના અન્ય કારણો
જોકે, માત્ર ચીન જ એકલું કારણ નથી. આ સિવાય પણ સોનામાં રેકોર્ડબ્રેક તેજી આવવા પાછળ બીજા કેટલાક મહત્વના કારણો જવાબદાર છે:
સટ્ટાકીય ખરીદી: મોટા પાયે થઈ રહેલી નફાખોરી.
ભૂ-રાજકીય તણાવ: દુનિયાના અલગ-અલગ દેશોમાં ચાલી રહેલા યુદ્ધ અને તણાવની સ્થિતિ.
ફેડરલ રિઝર્વની ચિંતા: અમેરિકન મધ્યસ્થ બેંકની નીતિઓ અને સ્વતંત્રતાને લઈને ઉભી થયેલી શંકાઓ.
આ ઉથલપાથલને કારણે જાન્યુઆરીની શરૂઆત પછી પહેલીવાર ડોલર (Dollar) મજબૂત થયો છે અને તેમાં સાપ્તાહિક તેજી જોવા મળી છે.
શેરબજારમાં ઐતિહાસિક ઉછાળો: Dow Jones 50,000ને પાર
એક તરફ સોનામાં હલચલ છે, તો બીજી તરફ અમેરિકન શેરબજારમાં જબરદસ્ત તેજી જોવા મળી છે. Dow Jones Industrial Average ઈન્ડેક્સ પહેલીવાર 50,000 ના લેવલને પાર કરી ગયો છે. નાણામંત્રી બેસેન્ટે આ રેકોર્ડને અમેરિકન અર્થતંત્ર માટે એક શુભ સંકેત ગણાવ્યો છે. તેમણે કહ્યું કે નવેમ્બરમાં આવનારી મધ્યવર્તી ચૂંટણીઓ પહેલાં આ તેજી બતાવે છે કે અમેરિકન ઈકોનોમી એક સારા તબક્કા (Up-cycle) તરફ આગળ વધી રહી છે, જેનો ફાયદો સામાન્ય નાગરિકોને થશે.
ફેડરલ રિઝર્વની નીતિ પર શું કહ્યું?
ફેડરલ રિઝર્વ (Federal Reserve) વિશે વાત કરતા બેસેન્ટે આશા વ્યક્ત કરી કે બેંક કોઈ પણ નિર્ણય ઉતાવળમાં નહીં લે. તેમણે કહ્યું કે, "મને નથી લાગતું કે તેઓ કોઈ પણ કામ જલ્દી કરશે. હાલમાં તેઓ મોટી બેલેન્સ શીટ સાથે ચાલી રહ્યા છે અને તેને ઘટાડવા માટે તેઓ કમસે કમ 1 વર્ષનો સમય લેશે."
વધુમાં તેમણે કહ્યું કે રાષ્ટ્રપતિ ડોનાલ્ડ ટ્રમ્પે કેવિન વોશને ફેડના આગામી ચીફ તરીકે પસંદ કર્યા છે. તેઓ સ્વતંત્ર રીતે કામ કરશે, પરંતુ તેમને એ વાતનું પણ ભાન હશે કે ફેડરલ રિઝર્વ અમેરિકાના લોકો પ્રત્યે જવાબદાર છે. આમ, અત્યારે સોનાના બજારમાં ચીનની હલચલ અને અમેરિકાની આર્થિક નીતિઓ પર આખી દુનિયાની નજર મંડાયેલી છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.