India Russia Oil Trade: રશિયા અને યુક્રેન યુદ્ધ બાદ બદલાયેલા વૈશ્વિક સમીકરણો વચ્ચે રશિયાએ અમેરિકા પર ગંભીર આરોપો લગાવ્યા છે. રશિયાનું કહેવું છે કે અમેરિકા ભારત જેવા દેશો પર દબાણ બનાવી રહ્યું છે જેથી તેઓ રશિયા પાસેથી ક્રૂડ ઓઈલ (કાચું તેલ) અને ગેસની ખરીદી બંધ કરી દે. રશિયાના વિદેશ મંત્રી સર્ગેઈ લાવરોવે દાવો કર્યો છે કે અમેરિકા પોતાની આર્થિક ધાક જમાવવા માટે 'જબરદસ્તી' વાળા રસ્તાઓ અપનાવી રહ્યું છે.
India Russia Oil Trade: અમેરિકાની જોહુકમી! ભારત પર રશિયન ઓઈલ ન ખરીદવા બનાવ્યું દબાણ ? રશિયાએ કર્યો મોટો દાવો
India Russia Oil Trade: રશિયાએ અમેરિકા પર ગંભીર આરોપ લગાવ્યો છે કે તે ભારતને સસ્તું રશિયન તેલ ખરીદતા રોકવા માટે દબાણ કરી રહ્યું છે. જાણો વિદેશ મંત્રી સર્ગેઈ લાવરોવે શું કહ્યું અને ભારતનો આ મામલે શું જવાબ છે.
MoneyControl Newsઅપડેટેડ Feb 11, 2026 પર 5:45 PM
અમેરિકાની દાદાગીરી અને શરતો
એક મીડિયા રિપોર્ટ અનુસાર, ભારત અને અમેરિકા વચ્ચે હાલમાં જે ટ્રેડ ડીલ (વ્યાપાર સમજૂતી) થઈ છે, તેમાં કથિત રીતે એવી શરત છે કે ભારતે રશિયા પાસેથી તેલ ખરીદવાનું બંધ કરવું પડશે. આ મુદ્દે ટીવી BRICS ને આપેલા એક ઇન્ટરવ્યુમાં રશિયન વિદેશ મંત્રી સર્ગેઈ લાવરોવે અમેરિકાની ઝાટકણી કાઢી હતી.
લાવરોવે કહ્યું કે, "અમેરિકા ભારત અને અન્ય દેશોને રશિયન તેલ ખરીદતા રોકવાનો પૂરો પ્રયાસ કરી રહ્યું છે. તેઓ આર્થિક દબાણ લાવવા માટે ટેરિફ વધારવા, પ્રતિબંધો મુકવા અને સીધી રોક લગાવવા જેવા હથકંડા અપનાવી રહ્યા છે."
સસ્તા તેલના વિકલ્પ સામે અમેરિકાનો વાંધો
રશિયાનો આરોપ છે કે અમેરિકા નથી ઈચ્છતું કે ભારત જેવા તેના ભાગીદાર દેશોને રશિયા પાસેથી સસ્તું અને કિફાયતી ઈંધણ મળે. લાવરોવે કહ્યું કે, "અમેરિકા ઈચ્છે છે કે ભારત અને અન્ય દેશો રશિયાનું સસ્તું તેલ છોડીને અમેરિકાની મોંઘી LNG (Liquefied Natural Gas) ખરીદવા મજબૂર થાય. યુરોપ પર તો તેમણે પહેલાથી જ પ્રતિબંધો લાદી દીધા છે."
તેમણે વધુમાં ઉમેર્યું કે હવે અમેરિકા ખુલ્લા સમુદ્રમાં ટેન્કરો સામે પણ જાણે ‘યુદ્ધ’ છેડી રહ્યું હોય તેમ વર્તી રહ્યું છે, જે સંયુક્ત રાષ્ટ્રના દરિયાઈ કાયદાનું ઉલ્લંઘન છે. અમેરિકા ઉર્જાના રસ્તાઓ અને મોટા બજારો પર કબજો કરવા માંગે છે.
યુક્રેન મુદ્દે અમેરિકાનો ‘યુ-ટર્ન'
લાવરોવે ગત વર્ષે અલાસ્કામાં થયેલી શાંતિ વાટાઘાટોનો પણ ઉલ્લેખ કર્યો હતો. તેમણે કહ્યું કે, "અમેરિકા અમને કહે છે કે યુક્રેનની સમસ્યાનો ઉકેલ આવવો જોઈએ. અમેરિકાએ એક પ્રસ્તાવ મૂક્યો હતો જે અમે સ્વીકારી લીધો હતો અને અમને આશા હતી કે પરસ્પર સહયોગથી ઉકેલ આવશે. પરંતુ હકીકત તેનાથી તદ્દન વિપરીત છે. હવે નવા પ્રતિબંધો લગાવવામાં આવી રહ્યા છે અને રસ્તામાં કૃત્રિમ અવરોધો ઉભા કરવામાં આવી રહ્યા છે."
ભારતનો જવાબ: રાષ્ટ્રીય હિત સર્વોપરી
એક તરફ રશિયાના આવા આક્ષેપો છે, તો બીજી તરફ એવા અહેવાલો પણ છે કે ભારતે રશિયાથી તેલની આયાત ઓછી કરી છે. જોકે, ભારત સરકારે પોતાની સ્થિતિ સ્પષ્ટ કરી છે. સોમવારે ભારતના વિદેશ સચિવ વિક્રમ મિસરીએ આ મુદ્દે મહત્વનું નિવેદન આપ્યું હતું. તેમણે કહ્યું હતું કે, "ભારત ઉર્જા સંબંધિત કોઈપણ નિર્ણય પોતાના ‘રાષ્ટ્રીય હિત’ને ધ્યાનમાં રાખીને જ લેશે." તેમણે સ્પષ્ટ કર્યું કે સરકાર માટે ભારતીય ગ્રાહકોના હિતોનું રક્ષણ કરવું અને મોંઘવારી કાબૂમાં રાખવી એ પહેલી પ્રાથમિકતા છે. એટલે કે, ભારત કોઈના દબાણમાં આવ્યા વગર ત્યાંથી જ તેલ ખરીદશે જ્યાંથી તેને ફાયદો થશે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.