ચીનની સરહદે ભારતની હવાઈ તાકાતમાં વધારો: અસમમાં નોર્થ-ઈસ્ટની પ્રથમ ઈમરજન્સી એર સ્ટ્રીપ તૈયાર

ભારતે ચીનની સરહદ નજીક પોતાની રણનીતિક તાકાતને વધુ મજબૂત કરી છે. અસમમાં નેશનલ હાઈવે-27 પર ડેમો અને મોરન વચ્ચે 4.5 કિલોમીટર લાંબી ઈમરજન્સી એર સ્ટ્રીપ તૈયાર કરવામાં આવી છે, જે નોર્થ-ઈસ્ટ ભારતની પ્રથમ એવી સુવિધા છે. આ એર સ્ટ્રીપ ભારતીય વાયુસેના (IAF) ના ફાઈટર જેટ અને ટ્રાન્સપોર્ટ એરક્રાફ્ટની ઈમરજન્સી લેન્ડિંગ માટે ડિઝાઈન કરવામાં આવી છે, જે ચીનની સરહદે ભારતની ત્વરિત પ્રતિક્રિયા ક્ષમતાને મજબૂત કરશે.

ઈમરજન્સી એર સ્ટ્રીપની વિશેષતાઓ

આ 4.5 કિલોમીટર લાંબી એર સ્ટ્રીપ ડિબ્રુગઢ નજીક આવેલી છે અને તેનું નિર્માણ નેશનલ હાઈવેઝ એન્ડ ઈન્ફ્રાસ્ટ્રક્ચર ડેવલપમેન્ટ કોર્પોરેશન લિમિટેડ (NHIDCL) દ્વારા કરવામાં આવ્યું છે. આ સ્ટ્રીપ પર સુખોઈ અને રાફેલ જેવા અદ્યતન ફાઈટર જેટ ઉપરાંત પેસેન્જર એરક્રાફ્ટ પણ લેન્ડ કરી શકશે. અસમના મુખ્યમંત્રી હિમંત બિસ્વા સરમાએ જણાવ્યું કે, “આ એર સ્ટ્રીપ ડિબ્રુગઢ એરપોર્ટ પર લેન્ડિંગ ન થઈ શકે તેવી પરિસ્થિતિમાં વૈકલ્પિક સુવિધા તરીકે કામ કરશે.”

ભારતીય વાયુસેનાનું ટ્રાયલ શરૂ

ભારતીય વાયુસેનાનું ઈસ્ટર્ન એર કમાન્ડ હાલમાં આ એર સ્ટ્રીપનું નિરીક્ષણ કરી રહ્યું છે. આગામી દિવસોમાં ફાઈટર જેટની ટ્રાયલ લેન્ડિંગ શરૂ થવાની શક્યતા છે, અને ઓક્ટોબર 2025 સુધીમાં આ એર સ્ટ્રીપ સંપૂર્ણ રીતે ઓપરેશનલ થઈ જશે. મુખ્યમંત્રી સરમાએ જણાવ્યું કે, “આ સુવિધા નોર્થ-ઈસ્ટમાં પ્રથમ છે, અને ભવિષ્યમાં એર શો જેવા કાર્યક્રમો માટે પણ તેનો ઉપયોગ થઈ શકશે.”

ચીન પર નજર, રણનીતિક મહત્વ

ચીનની સરહદે વધતી ગતિવિધિઓને ધ્યાનમાં રાખીને આ એર સ્ટ્રીપનું નિર્માણ ખૂબ જ મહત્વનું છે. પૂર્વોત્તર ભારતના સંવેદનશીલ વિસ્તારોમાં ઝડપી હવાઈ પ્રતિક્રિયા આપવાની ભારતની ક્ષમતા આ સુવિધાથી વધશે. આ ઉપરાંત, ભારત સરકારે અસમમાં વધુ બે એર સ્ટ્રીપ બનાવવાની મંજૂરી આપી છે—એક બોરોમા-તિહુમાં અને બીજી નાગાંવ-લુમડિંગ વચ્ચે શંકરદેવનગરમાં.