રિલાયન્સ ગેમિંગની દુનિયામાં પણ પ્રવેશ કરશે, BLAST સાથે ઈ-સ્પોર્ટ્સ બિઝનેસ માટે હાથ મિલાવ્યા

ભારતના સૌથી ધનાઢ્ય વ્યક્તિ મુકેશ અંબાણીની કંપની રિલાયન્સ હવે ટૂંક સમયમાં વિડિયો ગેમ્સના ક્ષેત્રમાં પણ કદમ મૂકવા જઈ રહી છે. રિલાયન્સની સંપૂર્ણ માલિકીની પેટાકંપની રાઇઝ વર્લ્ડવાઇડ ભારતમાં ઈ-સ્પોર્ટ્સ બિઝનેસ માટે એક સંયુક્ત સાહસ શરૂ કરશે. આ માટે રાઇઝ વર્લ્ડવાઇડે BLAST ઈ-સ્પોર્ટ્સ સાથે સ્ટ્રેટેજીક પાર્ટનરશીપ કરી છે. કંપનીના નિવેદન મુજબ, આ ભાગીદારી ભારતીય ગેમિંગ બજારમાં ઉચ્ચ સ્તરની ઇન્ટેલેક્યુઅલ પ્રોપર્ટી વિકસાવવા અને ચાહકો, પ્લેયર્સ તેમજ બ્રાન્ડ્સ માટે BLASTની આંતરરાષ્ટ્રીય સંપદા રજૂ કરવા પર ધ્યાન કેન્દ્રિત કરશે.

BLAST વિશ્વના સૌથી મોટા સ્પર્ધા આયોજકોમાંથી એક

ડેનમાર્ક સ્થિત APSની સંપૂર્ણ માલિકીની પેટાકંપની BLAST ગ્લોબલ સ્તરે સૌથી મોટા સ્પર્ધા આયોજકોમાં સામેલ છે. નિવેદનમાં જણાવાયું છે કે, “આ સંયુક્ત સાહસનો ઉદ્દેશ ભવિષ્યમાં ઉચ્ચ સ્તરના ઈવેન્ટ્સને આકર્ષવાનો છે.” BLASTના CEO રોબી ડોકે આ ભાગીદારી વિશે કહ્યું, “ભારતમાં અદ્ભુત કુશળતા અને દેશના દરેક ખૂણે પહોંચ ધરાવતી રિલાયન્સ સાથેની આ ભાગીદારી અમને પ્રાદેશિક ઈ-સ્પોર્ટ્સ ક્ષેત્રને નવી ઊંચાઈઓ પર લઈ જવાની શાનદાર તક આપે છે.”

વિશ્વના 18% ગેમર્સ ભારતમાં

રિલાયન્સના નિવેદનમાં કહેવાયું છે કે, “ભારત ઝડપથી વિકસતું ગેમિંગ બજાર છે, જ્યાં 600 મિલિયનથી વધુ ગેમર્સ (ગ્લોબલ સ્તરે કુલ ગેમર્સના 18%)નો મજબૂત આધાર છે. ભારતનું ગેમિંગ બજાર ~19% CAGRથી વધીને 2029 સુધીમાં 9.2 બિલિયન યુએસ ડોલર સુધી પહોંચવાની ધારણા છે, જે 2024માં 3.8 બિલિયન યુએસ ડોલર છે. ભારત સરકારે ઈ-સ્પોર્ટ્સને ‘મલ્ટી-સ્પોર્ટ્સ ઈવેન્ટ’ શ્રેણીમાં સામેલ કરીને તેને સત્તાવાર માન્યતા આપી છે.”

જિયો પણ નિભાવશે મહત્વની ભૂમિકા

રિલાયન્સ સ્પોર્ટ્સના વડા દેવાંગ ભીમજ્યાણીએ BLAST સાથેની ભાગીદારી વિશે કહ્યું, “આ સંયુક્ત સાહસ દ્વારા રિલાયન્સ ઇન્ડસ્ટ્રીઝ પોતાની રમતગમત પ્રત્યેની રુચિને ઈ-સ્પોર્ટ્સ સુધી વિસ્તારશે. ગેમિંગ ઈવેન્ટ્સ અને ટીમોના માર્કેટિંગ તેમજ પ્રચાર માટે રાઇઝની ક્ષમતાનો લાભ લેવામાં આવશે, સાથે જ જિયો પોતાની વિતરણ અને ટેકનોલોજી કુશળતા પૂરી પાડશે.”