Closing Bell: શેરબજારમાં હાહાકાર! સેન્સેક્સ 1068 પોઈન્ટ તૂટ્યો, નિફ્ટી 25,450 ની નીચે બંધ, IT સેક્ટરનો રકાસ

Closing Bell: ભારતીય શેરબજાર માટે સપ્તાહની શરૂઆત નિરાશાજનક રહી છે. આજે 24 ફેબ્રુઆરીના રોજ ટ્રેડિંગ સેશનના અંતે બજારમાં ભારે વેચવાલી જોવા મળી હતી. ખરાબ ગ્લોબલ સંકેતો અને IT સેક્ટરમાં આવેલા મોટા ઘટાડાને કારણે રોકાણકારોનો મૂડ બગડ્યો હતો. સેન્સેક્સ અને નિફ્ટી બંને ઇન્ડેક્સ 1% કરતા વધુ તૂટીને લાલ નિશાનમાં બંધ થયા છે.

બજાર બંધ થતા કઈ સ્થિતિ રહી?

આજના કારોબારના અંતે બોમ્બે સ્ટોક એક્સચેન્જનો સેન્સેક્સ 1068.74 પોઈન્ટ એટલે કે 1.28% ના જંગી ઘટાડા સાથે 82,225.92 ના સ્તરે બંધ થયો હતો. બીજી તરફ નેશનલ સ્ટોક એક્સચેન્જનો નિફ્ટી પણ 288.35 પોઈન્ટ એટલે કે 1.12% તૂટીને 25,424.65 ના લેવલ પર બંધ થયો છે. આમ, નિફ્ટીએ 25,450 નું મહત્વનું લેવલ ગુમાવી દીધું છે.

IT સેક્ટરમાં સૌથી મોટું ગાબડું

આજના કડાકાનું મુખ્ય કારણ IT શેરોમાં થયેલું ધોવાણ છે. બજારમાં આર્ટિફિશિયલ ઇન્ટેલિજન્સ (AI) ને લઈને ઉભી થયેલી ચિંતાઓની અસર IT કંપનીઓ પર જોવા મળી હતી. આંકડાઓ પર નજર કરીએ તો:

IT Index: સૌથી વધુ વેચવાલી અહીં જોવા મળી, જેના કારણે આખું ઇન્ડેક્સ 4% કરતા વધુ તૂટી ગયું હતું.

Realty Index: રિયલ્ટી સેક્ટરમાં પણ નરમાઈ રહી અને તે 2% થી વધુ ઘટ્યું હતું.