Tirupati Laddu Case: પવન કલ્યાણ થયા ગુસ્સે, ‘સનાતન ધર્મ રક્ષા બોર્ડ'ની રચના કરવાની કરી માંગ

Tirupati Laddu Case: આંધ્રપ્રદેશના પ્રખ્યાત તિરુપતિ વેંકટેશ્વર મંદિરમાં લાડુ પ્રસાદમાં ભેળસેળને લઈને સમગ્ર દેશમાં હોબાળો મચી ગયો છે. રાજ્યના મુખ્યમંત્રી ચંદ્રબાબુ નાયડુએ કહ્યું છે કે આ ઘટનાના આરોપીઓને છોડવામાં આવશે નહીં. તે જ સમયે, હવે આંધ્ર પ્રદેશના ઉપમુખ્યમંત્રી પવન કલ્યાણે પણ આ મામલે નિવેદન જાહેર કર્યું છે. પવન કલ્યાણે રાષ્ટ્રીય સ્તરે સનાતન ધર્મ રક્ષા બોર્ડની રચના કરવાની માંગ કરી છે. ચાલો જાણીએ આખો મામલો.

પવન કલ્યાણે શું કહ્યું?

આંધ્રપ્રદેશના નાયબ મુખ્યમંત્રી પવન કલ્યાણે આ સમગ્ર વિવાદ પર કહ્યું કે તિરુપતિ બાલાજીના પ્રસાદમાં પ્રાણીઓની ચરબી (માછલીનું તેલ, ડુક્કરની ચરબી અને બીફ ફેટ) ભેળવવામાં આવતી હોવાના મુદ્દે આપણે બધા પરેશાન છીએ. પવન કલ્યાણે કહ્યું કે તત્કાલીન સરકાર દ્વારા રચવામાં આવેલ તિરુમાલા તિરુપતિ દેવસ્થાનમ બોર્ડને ઘણા પ્રશ્નોના જવાબ આપવા પડશે.

સનાતન ધર્મ રક્ષા બોર્ડની માંગ

પવન કલ્યાણે કહ્યું છે કે અમારી સરકાર કડક કાર્યવાહી કરવા માટે પ્રતિબદ્ધ છે. પરંતુ આ કેસ મંદિરોની અપવિત્રતા, તેની જમીનના મુદ્દાઓ અને અન્ય ધાર્મિક પ્રથાઓ પર પ્રકાશ પાડે છે. પવન કલ્યાણે વધુમાં કહ્યું કે હવે સમય આવી ગયો છે કે ભારતભરના મંદિરો સંબંધિત તમામ મુદ્દાઓ પર ધ્યાન આપવા માટે રાષ્ટ્રીય સ્તરે 'સનાતન ધર્મ રક્ષા બોર્ડ'ની રચના કરવામાં આવે.

લાડુમાં પ્રાણીની ચરબીનો ઉપયોગ કરવાનો આરોપ

આંધ્રપ્રદેશના સીએમ ચંદ્રબાબુ નાયડુએ બુધવારે એનડીએ વિધાનસભ્ય પક્ષની બેઠકમાં દાવો કર્યો હતો કે અગાઉની વાયએસઆરસીપી એટલે કે જગન રેડ્ડી સરકારે શ્રી વેંકટેશ્વર મંદિરને પણ છોડ્યું ન હતું અને તેઓએ તિરુમાલા લાડુના ઉત્પાદનમાં ગૌણ સામગ્રી અને પશુ ચરબીનો ઉપયોગ કર્યો હતો. તે જ સમયે, YSRCPનું કહેવું છે કે નાયડુએ જગન મોહન રેડ્ડી અને અગાઉની સરકાર પર હુમલો કરવા માટે આ ઘૃણાસ્પદ આરોપ લગાવ્યો છે. આ નિંદનીય છે.