સંયુક્ત રાષ્ટ્રના વડાએ પણ પહેલગામ હુમલાની કરી નિંદા, પાકિસ્તાનને ખખડાવ્યું; કહ્યું નાગરિકોને નિશાન બનાવવું અસ્વીકાર્ય

સંયુક્ત રાષ્ટ્ર (UN)ના મહાસચિવ એન્ટોનિયો ગુટેરેસે જમ્મુ અને કાશ્મીરના પહેલગામમાં થયેલા આતંકવાદી હુમલાની સખત શબ્દોમાં નિંદા કરી છે. આ હુમલામાં 25 પ્રવાસીઓ સહિત કુલ 26 લોકોના મોત થયા હતા. જાહેર કરાયેલા એક ટૂંકા નિવેદનમાં ગુટેરેસે ભારત અને પાકિસ્તાન વચ્ચે વધી રહેલા તણાવને ઘટાડવા માટે પણ આહ્વાન કર્યું હતું.

તેમણે બંને પક્ષોને મહત્તમ સંયમ જાળવવા અને યુદ્ધની પરિસ્થિતિથી પાછા હટવા વિનંતી કરી હતી. ગુટેરેસે પોતાના નિવેદનમાં સ્પષ્ટપણે જણાવ્યું હતું કે, "બંને પક્ષો કોઈ ભૂલ ન કરે. સૈન્ય ઉકેલ કોઈ ઉકેલ નથી."

મહાસચિવે 22 એપ્રિલના રોજ પહેલગામમાં થયેલા ભયાનક આતંકવાદી હુમલા બાદની તીવ્ર લાગણીઓને સમજતા હોવાનું જણાવ્યું હતું. તેમણે ફરી એકવાર આ હુમલાની આકરી નિંદા કરી અને પીડિતોના પરિવારો પ્રત્યે ઊંડી સંવેદના વ્યક્ત કરી હતી. ગુટેરેસે ભારપૂર્વક કહ્યું હતું કે, "નાગરિકોને નિશાન બનાવવું કોઈપણ સંજોગોમાં અસ્વીકાર્ય છે - અને જવાબદાર લોકો સામે વિશ્વસનીય અને કાયદેસરની રીતે કાર્યવાહી થવી જોઈએ."

શાંતિ પહેલને UNનું સમર્થન

ગુટેરેસે શાંતિ સ્થાપનાના પ્રયાસોમાં બંને સરકારોને પોતાના સારા કાર્યોની મદદ કરવાની તૈયારી પણ દર્શાવી હતી. તેમણે કહ્યું હતું કે, "સંયુક્ત રાષ્ટ્ર કોઈપણ એવી પહેલને સમર્થન આપવા તૈયાર છે જે તણાવ ઘટાડે, કૂટનીતિ અને શાંતિ માટે નવી પ્રતિબદ્ધતાને પ્રોત્સાહન આપે."

બેઠકોનો દોર અને મોકડ્રિલના આદેશ

દરમિયાન, કેન્દ્રીય ગૃહ મંત્રાલયે તમામ રાજ્યોને મોકડ્રિલ હાથ ધરવા સૂચના આપી છે. આ પહેલાં, ભારત અને પાકિસ્તાન વચ્ચે વધતા તણાવની પૃષ્ઠભૂમિમાં સંરક્ષણ સચિવ રાજેશ કુમાર સિંહે સોમવારે વડા પ્રધાન નરેન્દ્ર મોદી સાથે મુલાકાત કરી હતી. માનવામાં આવે છે કે તેમણે વડા પ્રધાનને સશસ્ત્ર દળોની યુદ્ધ તૈયારી વિશે માહિતી આપી હતી. આ બેઠક વાયુસેના પ્રમુખ એર ચીફ માર્શલ એ.પી. સિંહની વડા પ્રધાન મોદી સાથેની મુલાકાતના એક દિવસ બાદ થઈ હતી.