UPI દ્વારા ટ્રાન્ઝેક્શન કરનારા યુઝર્સને મોટો ફટકો, હવે આ સર્વિસ માટે ચૂકવવા પડશે અલગથી રૂપિયા

દેશની વસ્તીનો મોટો ભાગ દૈનિક ટ્રાન્જેક્શનો માટે UPI નો ઉપયોગ કરે છે. હવે UPI દ્વારા દુકાનો પર માત્ર ચુકવણી જ નહીં, પરંતુ ઘણા મહત્વપૂર્ણ કાર્યો પણ સરળતાથી પૂર્ણ કરી શકાય છે. દેશની બીજી સૌથી મોટી UPI પેમેન્ટ કંપની, Google Pay, ઘણી સર્વિસ માટે યુઝર્સ પાસેથી સુવિધા ફી વસૂલ કરી રહી છે. પરંતુ એવું જોવા મળ્યું છે કે મોટાભાગના Google Pay યુઝર્સ વિવિધ સર્વિસ માટે લેવામાં આવતી સુવિધા ફીથી અજાણ છે. એક અહેવાલ મુજબ, ગૂગલ પેએ તેના યુઝર્સ પાસેથી એવી સર્વિસ માટે ચાર્જ વસૂલ્યો છે જે અગાઉ મફત હતી.

આ સર્વિસ માટે તમારે અલગથી ચૂકવણી કરવી પડશે

રિપોર્ટ અનુસાર, ગુગલ પેએ વીજ બિલ, ગેસ બિલ વગેરે જેવી પેમેન્ટ્સ માટે યુઝર્સ પાસેથી સુવિધા ફી વસૂલ કરી છે. જોકે, આ વસૂલાત ત્યારે જ થઈ છે જ્યારે યુઝર્સએ ક્રેડિટ કાર્ડ દ્વારા આ બિલો ચૂકવ્યા હોય. ક્રેડિટ અથવા ડેબિટ કાર્ડનો ઉપયોગ કરીને વીજળી અને ગેસ બિલ ચૂકવનારા યુઝર્સ પાસેથી હવે ફી વસૂલવામાં આવી રહી છે. તમને જણાવી દઈએ કે UPI પેમેન્ટ કંપનીઓ પહેલાથી જ મોબાઇલ રિચાર્જ માટે ફી વસૂલ કરી રહી છે. ગુગલ પે ઉપરાંત, ફોનપે અને પેટીએમ પણ કસ્ટમર્સ પાસેથી ફી વસૂલ કરી રહ્યા છે. આ ફી ટ્રાન્જેક્શન વેલ્યૂના 0.5%થી 1% સુધીની હોઈ શકે છે. એટલું જ નહીં, આ સર્વિસ માટે GST પણ ચૂકવવો પડશે.

ફી ફક્ત કાર્ડ દ્વારા પેમેન્ટ પર જ ચૂકવવાની રહેશે

ગુગલ પે વિવિધ પ્રકારની બિલ ચુકવણી સુવિધાઓ પૂરી પાડે છે. જોકે, આ પ્લેટફોર્મ પર ઘણી પેમેન્ટ્સ માટે કાર્ડ દ્વારા ચુકવણી કરવાનો વિકલ્પ ઉપલબ્ધ નથી. જો ગુગલ પે યુઝર્સ તેમના ક્રેડિટ કાર્ડ અથવા ડેબિટ કાર્ડ દ્વારા બિલ ચૂકવે છે, તો તેમણે ફી પણ ચૂકવવી પડશે. જોકે, જો તેઓ UPI લિંક્ડ બેન્ક ખાતામાંથી સીધા ચુકવણી કરે છે, તો તેમને કોઈ ફી ચૂકવવાની રહેશે નહીં. તમને જણાવી દઈએ કે ભારતમાં UPI સર્વિસ પૂરી પાડતી મોટી કંપનીઓની યાદીમાં PhonePe પ્રથમ સ્થાને છે, જેનો કુલ બજાર હિસ્સો 47.8 ટકા છે. ગૂગલ પે 37 ટકા હિસ્સા સાથે બીજા સ્થાને છે.

આ પણ વાંચો - નાણા મંત્રાલય 4 માર્ચે જાહેર ક્ષેત્રની બેન્કોના વડાઓ સાથે કરશે મહત્વની બેઠક, જાણો કયા મુદ્દાઓ પર થશે ચર્ચા