FASTag Annual Pass: વાર્ષિક ફાસ્ટેગ 15 ઓગસ્ટથી થશે શરૂ, રુપિયા 15માં ટોલ પ્લાઝા કરી શકશો પાર! જાણો કેવી રીતે

FASTag Annual Pass:  જો તમે વારંવાર નેશનલ હાઈ-વેનો ઉપયોગ કરો છો, તો તમારા માટે સારા સમાચાર છે. 15 ઓગસ્ટથી, કેન્દ્ર સરકાર વાર્ષિક ફાસ્ટેગ શરૂ કરવા જઈ રહી છે. આ નવા નિયમ સાથે, ટોલ પ્લાઝા પાર કરવાનું હવે વધુ સરળ બનશે. આ વાર્ષિક ફાસ્ટેગ યોજના મુખ્યત્વે કાર, જીપ અને વાન જેવા ખાનગી વાહનો માટે લાગુ થશે. ભારે વ્યાપારી વાહનો તેમાં શામેલ નથી. વાર્ષિક ફાસ્ટેગ માટે, તમારે 3000 રૂપિયા રિચાર્જ કરવા પડશે, જેમાં તમને 200 ટ્રીપ મફત મળશે.

સામાન્ય રીતે ટોલ પ્લાઝા પર વાહનના વજનના આધારે રુપિયા 100 થી રુપિયા 200ની ટોલ ફી વસૂલવામાં આવે છે, પરંતુ રુપિયા 3,000નો વાર્ષિક ફાસ્ટેગ પાસ ખરીદવાથી એક ટ્રીપનો ખર્ચ માત્ર રુપિયા 15 થશે. આ યોજના લોકોના પૈસા તો બચાવશે જ પણ ટોલ પ્લાઝા પાર કરવાનું પણ સરળ બનાવશે.

આટલા પૈસામાં ટોલ પ્લાઝા પાર કરી શકશો

15 ઓગસ્ટથી, તમે નવો વાર્ષિક ફાસ્ટેગ પાસ લઈને માત્ર 15 રૂપિયામાં ટોલ પ્લાઝા પાર કરી શકશો. જો તમે માત્ર 15 રૂપિયામાં ટોલ પાર કરવા માંગતા હો, તો નવો વાર્ષિક ફાસ્ટેગ પાસ તમારા માટે ફાયદાકારક છે. આ પાસની કિંમત 3,000 રૂપિયા હશે અને તેમાં 200 ટ્રિપ્સ શામેલ હશે. એક ટ્રીપ એટલે એકવાર ટોલ પ્લાઝા પાર કરવો. હાલમાં, 200 વખત ટોલ પાર કરવા માટે લગભગ 10,000 રૂપિયાનો ખર્ચ થાય છે, પરંતુ આ યોજનામાં તે જ કામ ફક્ત 3000 રૂપિયામાં થશે. એટલે કે, પેસેન્જર વાહન માલિકોને લગભગ 7000 રૂપિયાની સીધી બચત થશે.