LIC Policy: બંધ પડેલી LIC પૉલિસી ફરી શરૂ કરવાનો ગોલ્ડન ચાન્સ, સરકારી કંપનીએ શરૂ કર્યું ખાસ અભિયાન

LIC Policy: ભારતની સૌથી મોટી વીમા કંપની, ભારતીય જીવન વીમા નિગમ (LIC)એ બંધ પડેલી વ્યક્તિગત વીમા પૉલિસીઓને ફરી શરૂ કરવા માટે એક ખાસ અભિયાનની જાહેરાત કરી છે. આ અભિયાન 18 ઓગસ્ટ, 2025થી શરૂ થઈ ગયું છે અને 17 સપ્ટેમ્બર, 2025 સુધી ચાલશે. આ એક મહિનાના અભિયાન દરમિયાન, પૉલિસીધારકોને લેટ ફીમાં આકર્ષક ડિસ્કાઉન્ટ આપવામાં આવશે, જેથી તેઓ તેમની બંધ પૉલિસીઓને સરળતાથી રિવાઇવ કરી શકે.

લેટ ફીમાં 30% સુધી ડિસ્કાઉન્ટ, માઇક્રો ઇન્શ્યોરન્સ પર 100% રાહત

LICએ જણાવ્યું કે, આ અભિયાન હેઠળ નૉન-લિંક્ડ (ટર્મ ઇન્શ્યોરન્સ) પૉલિસીઓ માટે લેટ ફીમાં 30% સુધીનું ડિસ્કાઉન્ટ આપવામાં આવશે, જે મહત્તમ 5000 રૂપિયા સુધી હોઈ શકે છે. આ ઉપરાંત, માઇક્રો ઇન્શ્યોરન્સ પૉલિસીઓ, જે ખાસ કરીને નીચલી આવક ધરાવતા પરિવારો અને વ્યક્તિઓ માટે છે, તેમાં લેટ ફીમાં 100% રાહત આપવામાં આવશે. આ અભિયાનનો લાભ લેવા માટે, પૉલિસીધારકે પૉલિસીની પહેલી બાકી પ્રીમિયમની તારીખથી 5 વર્ષની અંદર પૉલિસી રિવાઇવ કરવાની રહેશે, જો તે પૉલિસીના નિયમો અને શરતોને પૂર્ણ કરતી હશે.

મેડિકલ શરતોમાં કોઈ રાહત નહીં

LICએ સ્પષ્ટ કર્યું છે કે મેડિકલ અથવા હેલ્થ સંબંધિત આવશ્યકતાઓમાં કોઈ રાહત આપવામાં આવશે નહીં. આ અભિયાનમાં તે જ પૉલિસીઓ રિવાઇવ કરી શકાશે, જે પ્રીમિયમ ચૂકવણી દરમિયાન બંધ થઈ ગઈ હોય અને જેની પૉલિસી અવધિ હજુ પૂર્ણ ન થઈ હોય. આ અભિયાન ખાસ કરીને તે પૉલિસીધારકો માટે છે, જેઓ કોઈ પ્રતિકૂળ પરિસ્થિતિને કારણે સમયસર પ્રીમિયમ ચૂકવી શક્યા ન હતા.