Google Payનું નવું ફીચર, હવે આધારની મદદથી યુઝર્સ બનાવી શકશે UPI એકાઉન્ટ, ATMની નહીં પડે જરૂર

Google Pay: ગૂગલ પેએ પોતાના યુઝર્સ માટે એક ખાસ ફીચર લોન્ચ કર્યું છે. તેની મદદથી યુઝર્સ હવે એટીએમ કાર્ડ વગર પણ પોતાનું યુપીઆઈ એકાઉન્ટ બનાવી શકશે. ગૂગલ પેએ કહ્યું કે એટીએમ કાર્ડને બદલે હવે યુઝર્સ તેમના આધાર નંબરની વેરિફિકેશન કરીને UPI એકાઉન્ટ ખોલી શકશે. ગૂગલ પેની હરીફ કંપની PhonePeએ પણ થોડા દિવસો પહેલા આવી જ સર્વિસ લોન્ચ કરી હતી. જો કે, આધાર દ્વારા UPI એકાઉન્ટ બનાવવા માટે, તે જરૂરી છે કે યુઝર્સનું બેન્ક એકાઉન્ટ અને ફોન નંબર પણ તેમના આધાર સાથે લિંક હોય. જો આમ ન થાય તો તેઓએ પોતાનું બેન્ક એકાઉન્ટ આધાર સાથે લિંક કરવું પડશે.

ગૂગલ પેએ કહ્યું કે તેની નવી સુવિધાઓ લગભગ 22 બેન્કોના ખાતાધારકો માટે ઉપલબ્ધ છે. આ તમામ બેન્કો UPI માટે આધાર આધારિત OTP નંબર વેરિફિકેશનની સર્વિસને સમર્થન આપે છે. ગૂગલના પ્રોડક્ટ મેનેજમેન્ટ ડાયરેક્ટર શરત બુલુસુએ જણાવ્યું હતું કે આ નવી સુવિધાઓ યુઝર્સ માટે વસ્તુઓને સરળ અને સુવિધાજનક બનાવવામાં મદદ કરશે.

બુલુસુએ એક અખબારી નિવેદનમાં જણાવ્યું હતું કે, “નાણાકીય સમાવેશના સરકારના ધ્યેયને અનુરૂપ, આ વિશેષતાઓ ભારતમાં ડિજિટલ ચૂકવણીના વલણને વધારવાના ધ્યેયને વધુ મજબૂત બનાવશે. છેલ્લા કેટલાક વર્ષોમાં દેશમાં ડિજિટલ ચુકવણીઓ ઝડપથી વધી છે અને આ સુવિધાઓ UPI ઇકોસિસ્ટમને વધારવામાં વધુ મદદ કરશે."

ગૂગલ પે એપ ઇન્સ્ટોલ કર્યા પછી, યુઝર્સને હવે UPI એકાઉન્ટ બનાવવા માટે બે વિકલ્પો મળશે. પ્રથમ - ડેબિટ કાર્ડ દ્વારા, બીજું - આધાર દ્વારા. Google Pay એ કહ્યું કે તે યુઝર્સના આધાર નંબર તેમની સાથે સંગ્રહિત કરશે નહીં અને ફક્ત વેરિફિકેશનની પદ્ધતિ તરીકે કાર્ય કરશે.